جج دھڑکو کیس، عمران خان نا وارنٹ ضمانت وڑ اٹ بدل
خواست 30 مارچ اسکان نا کننگ انگ ءِ، دزگیری نا پرمان 29 مارچ اسکان نا ءِ، جج فیضان حیدر گیلانی
اسلام آباد/ لاہور: سیشن کورٹ اسلام آباد نیاڑی جج دھڑکو کیس اٹ پی ٹی آئی چیئرمین عمران خان نا لیگل ٹیم انا وارنٹ معطلی ءِ 30 مارچ اسکان ودفنگ نا خواست آ وارنٹ ضمانت وڑ اٹ بدل کرے۔ عدالت پی ٹی آئی نا وارنٹ معطلی نا درخواست ءِ پارت تون اوار سر تننگا۔ ڈسٹرکٹ اینڈ سیشن کورٹس اٹ ایڈیشنل سیشن جج فیضان حیدرگیلانی کیس انا سماعت ءِ کرے ہراٹی پراسیکیوٹر راجا رضوان عباسی و عمران خان نا وکیل گوہر علی پیش مسر۔ پراسیکیوٹر عدالت آن خواست کرے کہ عمران خان ءِ بروک آ تاریخ آ پیش مننگ کن پابند کننگے۔ عمران خان نا وکیل تینا موکل نا وارنٹ معطلی ٹی 30 مارچ اسکان توسیع کننگ نا خواست کرے وپارے کہ توشہ خانہ کیس اٹ ہم 30 مارچ اسکان وارنٹ معطل ءِ۔ وکیل گوہر علی عدالت ءِ پارے کہ 30مارچ آ عمران خان توشہ خانہ کیس اٹ کچہری آ بننگ اٹی ءِ‘ نی ہم 30 مارچ انا تاریخ ایت۔ او عدالت ءِ مستی پارے کہ نی وارنٹ معطلی جاری کے‘ ای سول کورٹ اٹ کاوہ دزگیری وارنٹ نا تاریخ ءِ 29 آن 30مارچ کننگ نا درخواست ایتوہ۔ لاہور ہائی کورٹ اٹی نیب چیئرمین پی ٹی آئی عمران خان نا برخلاف مقدمہ غاتا سرجم آتا فراوانی نا دائر درخواست آ ورندی جمع کرفے۔ جسٹس طارق سلیم شیخ عمران خان نا برخلاف مقدمہ غاتا سرجم آتا فراوانی نا درخواست آ جمعہ نادے آ سماعت کرے ہراٹی نیب، اینٹی کرپشن و پولیس تھانہ غاتیٹی نوشتہ مقدمہ غاتا سرجم آتا فراوانی نا خواست کننگاسس۔ نیب انا کنڈآن ورندی ٹی عدالت ءِ معلومدار کننگاکہ نیب راولپنڈی آن بیدس پاکستان اٹی پین اسہ جاگہ اس ہم عمران خان نا برخلاف مقدمہ اف۔ نیب انا کنڈآن جمع کرفوک رپورٹ اٹی پاننگاکہ عمران خان نا برخلاف نیب اٹی 2 کیس ءُ ہرافتا جاست وپاست نیب راولپنڈی کننگ ءِ، عمران خان نا برخلاف توشہ خانہ نا ٹیکی و واکداری تیان گدرینگ انگ نا باندات نا انکوائری برجاءِ۔ واکداری تا غلط کاریم اٹ اتسا مالی فائدہ ہلنگ و ریکارڈ ءِ ڈکھنگ نا باندات آ ہم انکوائری برجاءِ۔ نیب رپورٹ اٹی مستی پاننگاکہ عمران خان نا برخلاف ہڑتوم آ کیس آک انکوائری سٹیج آٹی ءُ۔ کال اپ نوٹس جاری کننگا۔ نیب عدالت آن عمران خان نا درخواست ءِ سرتننگ نا خواست کرے۔ عدالت تدوک آ سماعت آ نیب و اینٹی کرپشن ءِ عمران خان نا دزگیری آن تورسا 24 مارچ آ رپورٹ جمع کرفنگ ناپرمان کریسس۔
(آن لائن /اے پی پی)