طالبان تا نزوری اوغانستان اسکان سلپک، اوغان وزیر خارجہ

کابل : اوغانستان نا وزیر خارجہ امیر خان متقی خبردار کرینے کہ طالبان حکومت ءِ نزور کننگ نا نتیجہ غاک اوغانستان اسکان کچ اٹ مفسہ‘ بلکہ ننا ہمسائے ملک‘ ڈیہہ و دنیا کن ہم مشکل ودی مریک‘ تینا بیان اٹ اوغان وزیرخارجہ امیر خان متقی پارے کہ طالبان حکومت ءِ نزور کننگ آن ہرا انسانی المیہ ودی مریک دانا زہمک اوغانستان اسکان کچ اٹ مفسہ‘ داحالیت آتے ٹی سکیورٹی‘ باہوٹ‘ زرگزرانی‘ جانجوڑی و ایلو بشخ آتے ٹی ہندن ءُ چیلنج ودی مریک ہرا ننا ہمسائے ملک‘ ڈیہہ ودنیا کن مشکل مریرہ‘ اوپارے کہ امریکہ و ایلو ملک آک یات کیر کہ پابندی خلنگ و زور شاغنگ آن اختلاف آک ایسر مننگ کپسہ‘ تین پہ تینی پت آن ویل آتے ایسر کننگ مریک‘ اوغانستان اٹ بے سہب حکومت آتا تاریخ اس ارے و جہانی واکدار و سوگو آ سیوت آک ہم دادے توننگ اٹ بے سہب مسنو۔ امیر متقی پارے کہ دا خرین ءُ راست اسے کہ تدوک آ 2 دہائی آن اوغان زرگزران نا مچ آ سیبو پیشن نا کمک آ مسنے۔ داسہ درملکی کمک نا سلنگ آن پد اوغان الس نا بندادی گرج آتے پورو کننگ المی ءِ۔ اوغانستان اٹ اولیتی بنداو آ روزگار نا وارخواہی و انفراسٹرکچر ءِ بحال و پورو کننگ المی ءِ۔ طالبان وزیر خارجہ پارے کہ جہانی برادری اوغانستان نا وتواجہی نا احترام ءِ کرسا سیاسی و اقتصادی تعلقداری تے بحال کے۔