پاکستان تحریک انصاف نا باسک آک استیفہ غاتاپدی ہلنگ کن خوار

باسک آتے کن کل کسرک بند، اسپیکر قومی اسمبلی نا اُرا غا ہننگ آن ہم توننگار، باسک آتا برانز، پولیس بٹنگ انگا

0

Get real time updates directly on you device, subscribe now.

اسلام آباد : قومی اسمبلی آن استیفہ غاتا پدی ہلنگ کن پاکستان تحریک انصاف (پی ٹی آئی) نا باسک آک خوار مسنو۔ استیفہ تننگ کن ہنوک پی ٹی آئی نا 45 ایم این اے ءِ اسپیکر راجہ پرویز اشرف نا اُرا غا ہننگ آن توننگا۔ سرجم حوال آتا رداٹ پاکستان تحریک انصاف نا 45 باسک ءِ استیفہ غاتا پدی ہلنگ کن اسیجائی وڑ اٹ اسپیکر نا اُرا غا ہنوئی ئسکہ، و دا پڑو آن دمدستی پد کانود نافذ کروک آک مونی بسر، و پی ٹی آئی باسک آتے راجہ پرویز اشرف نا اُرا غا ہننگ آن توریر۔ اسلام آباد پولیس نا کنڈ آن پی ٹی آئی باسک آتے منسٹر انکلیو نا پیشن آ توننگا، و اوفتے پاننگا کہ مونی ہننگ نا موکل اف۔ اوکان پد باسک آک برانز کرسا ہموڑے دھرنا تسر۔ وخت اس کہ منسٹر انکلیو نا پیشن آ نیاڑی کارندہ غاتتون اوار پولیس نا ودکی نفری بٹنگ انگا۔ پی ٹی آئی باسک آک دا وخت آ پبی برانز کریر، و نعرہ ہم خلکر۔ اوفتا پاننگ ئس کہ اوفک اسپیکر قومی اسمبلی تون اوڑدہی آن پد پدی ہنپسہ۔ اخیر اٹ پولیس تون مذاکرات آن پد باسک آک برانز ءِ چٹفیر، و الیکشن کمیشن دفتر نا کنڈ آ راہی مسر۔ اوڑے ہم اوفتے جوان ءُ فائدہ اس دوئی متو۔ دا وخت آ چیف الیکشن کمشنر تون اوڑدہی آن پد میڈیا تون ہیت و گپ کرسا عامر ڈوگر پارے کہ الیکشن کمیشن آن خواست کرینن کہ ہرا اسمبلی پنانے، اوڑا گچین کاریی کرفنگے، وخت اس کہ نگران وزیراعلیٰ پنجاب نا بابت ہم الیکشن کمیشن ءِ تینا گڑتی تیان معلومدار کرینن۔ الیکشن کمیشن تون کل پالو تیا پاش آن پاش ہیت کرینن۔ او پارے کہ دا وخت آ ننا 45 باسک ءُ، استیفہ غاتیا لیڈ شپ نا میٹنگ مریک، ہراٹی اپوزیشن لیڈر و پارلیمانی لیڈر نا پن مونی بریک، ولدا آخبت نا لائحہ عمل اس سجفنگک۔ عامر ڈوگر پارے کہ حکومت نا کنڈ آن تو دا پاننگا کہ پی ٹی آئی والاک اسمبلی تیان پیشن ءُ، اوفک تنخواہ ہلنگ اٹی ءُ، 10 اپریل آن اینو اسکان 127 باسک ءِ اسمبلی آن روپئی اس ہم رسینگتنے، نئے نن خواست کرینن۔ اگہ لاجز اٹی منہ بندگ اس رہینگ انگ ءُ، تو اوفک اوفتا کرا ءِ تننگ اٹی ءُ۔ او پارے کہ نن اسمبلی ٹی ہننگ خواپنہ، نئے اوڑے تولنگ نا خواہندار اُن، بس نن تینا منشا نا اپوزیشن لیڈر اس اتنگ خوانہ۔

(آن لائن/ مانیٹرنگ ڈیسک)

Get real time updates directly on you device, subscribe now.

Leave A Reply

Your email address will not be published.