حکومت پین تا پاننگ آ حالیت آتے خراب کننگ اٹی ءِ،نواب رئیسانی

گوادر(آن لائن) مسکوہی وزیراعلیٰ بلوچستان وچیف آف ساراوان نواب محمد اسلم خان رئیسانی پارینے کہ بدقسمتی ٹی ملکی اسٹیلبشمنٹ بے اعتبار ءِ، بھاز آ بندغ آک بلوچستان عوامی پارٹی ٹی پرمٹ،لائسنس او ٹھیکہ کن اوار مننگ اٹی ءُ، شہید نوابزادہ میر سراج رئیسانی ءِ کاریم اٹ اتوک آک اینو اودے اُست آن درینو، تینا بندغ آتا اسٹیبلشمنٹ تون وفاداری نا سوب آن بلوچ جہد ءِ نسخان رسینگ انگ ءِ۔ دا خیال آتا درشانی ءِ میڈیا تون ہیت وگپ کرسا کرے او پارینے کہ کنا تینا چُنکا ایلم شہید سراج رئیسانی تون ہچ ءُ تین پہ تینی خرینی اس الو، ای اودے پاریسُٹ کہ او اسٹبلشمنٹ آن مُر مرے انتئے کہ اسٹبلشمنٹ نا مزاج بے اعتبار ءِ وخت اس کہ او مطلب نا پوروی آن پد گڑا ءِ خسک، بمب دھماکہ ٹی کنا تینا بندغ آتون اوار شہید مس، بنا ٹی اوفک مچہ بھاز دانگ اینگ پیری کریر ولے داسہ اِرا سال گدرینگانے کس اس ہم ہرفنگ کن بتنے ای اونا بھلا ایلم اُٹ ای دعا خواہنگ کن کاوہ او ننا اُلس ہم دعا خواہک کن اوڑے کاہک ولے اسٹبلشمنٹ شہید سراج رئیسانی ءِ اُست آ درے ہرافک شہید سراج رئیسانی ءِ کاریم اٹ ایسر اینو ہرفنگ کن ہم بفسہ اسہ سوج اسے نا ورندی ٹی او پارینے کہ بلوچستان اٹ انت اس کہ مننگ اٹی ءِ اوٹی ننا بندغ آک ہم اوار ءُ نن بلوچی و براہوئی ٹی تینا بندغ آتے پہہ کینہ کہ دن کپبو داوڑ نا کاریم تیان بلوچ جہد ءِ نسخان رسینگک ولے اُلس ہچ اس پہہ مفک، او پارینے کہ ننا جند انا بندغ آک اسٹبلشمنٹ نا دو اٹی ءُ او بلوچستان اٹ انت اس کہ بیدادی مننگ اٹی ءِ اوفتے ٹی ننا بندغ آک اولیکو صف انا کڑد ءِ ادا کننگ اٹی ءُ، اگہ ننا بندغ آک اسٹبلشمنٹ تون کمک کپس تو ننا بھاز آ سختیک آسان مریرہ اسہ سوج اسے نا ورندی ٹی محمد اسلم رئیسانی پارینے کہ بلوچستان اٹ ہرا ڈیتھ اسکواڈ ءِ اوٹی ننا بندغ آک اوار ءُ، اصل ویل ہندادے کہ ننا بندغ آک تینٹ ملوک ءُ، او پارینے کہ اسٹبلشمنٹ باپ آنبار ءُ پارٹی جوڑ کیک دا ہچ ءُ سیاسی ءُ پارٹی اس اف ولے داڑان بیدس ننا بندغ آک پرمٹ لائسنس او ٹھیکہ کن اوفتا کنڈ آ ہننگ اٹی ءُ، وخت اس کہ داٹی اوار مننگ اٹی ءُ۔