بھاز زُو ڈی ایچ کیو کوہلو ٹی اسٹاف بھرتی کننگ نا بناءِ کینہ، میر نصیب مری

کوہلو (خ ن) صوبائی اسمبلی نا باسک میر نصیب اللہ مری ڈسٹرکٹ ہیڈ کوارٹر کوہلو ہسپتال نا دورہ ءِ کرے‘دا وخت آ ضلعی ناظم جانجوڑی ڈاکٹر گہنوار خان و ایم ایس ڈاکٹر اصغر اسک صوبائی اسمبلی نا باسک ءِ ہسپتال نا بارو اٹ جم وڑ اٹ بریفنگ تسر‘ صوبائی اسمبلی نا باسک ہسپتال نا شعبہ ایمرجنسی‘ میڈیسن روم‘ لیبارٹری روم، میل و فیمیل وارڈ تون اوار ا یلو بشخ آتا جم جاچ ءِ ہلک و ہسپتال اٹ ناجوڑ آتا جانپڑسی ءِ کرے۔ اوکان گڈ او ذرائع ابلاغ نا نمائندہ غاتتون ہیت وگپ کرسا پارے کہ ہسپتال اٹ دارو تا تنکی خڑک انا ضلع غاتا ناجوڑ تا رش انا سوب آن ودی مسنے‘ ہسپتال اٹ ضلع کوہلو آن بیدس بارکھان‘ پیلاوغ‘ ڈیرہ بگٹی‘ دکی‘ہوسٹری و چندی خڑک انا علاقہ غاتا ناجوڑ آک بریرہ‘دارو تیکن ڈائریکٹر ایم ایس ڈی ءِ پاننگانے او ہلہلہ ئی بنداو آ دارو فراوان کننگ نا پورو باور کرفینے۔ ہسپتال اٹ لیڈی ڈاکٹر مفننگ ناسوب آن نیاڑی ناجوڑ آتے مشکل آک مون تروک ءُ۔ اوپارے کہ زوت لیڈی ڈاکٹر و اسٹاف نرس آتے کنٹریکٹ نا بنداو ا بھرتی کینہ تاکہ نیاڑی ناجوڑ آتا مشکل آک کم مننگ کیر۔ ڈسٹرکٹ ہیڈ کوارٹر ہسپتال کوہلو صوبہ نا جوان انگا ہسپتال آتیان اسٹ ءِ۔ اوپارے کہ چنکو وخت اسے ٹی حلقہ ٹی ریکارڈ شونداری کاریم مسنے ہرانا شاہدی مستین رسینگپک‘ داسہ نا پی ایس ڈی پی ٹی الس کن کنوئی ءُ دیر‘ جانجوڑی‘ تعلیم‘ بجلی‘ سڑک و زند انا ایلو بنداوی آسراتی تا کروڑ آروپئی تا ڈٹ آتے اوار کننگانے‘ ضلع نا خورک انگا اسامی تیا میرٹ ءِ پک کننگک۔