جسٹس قاضی فائز عیسیٰ و جسٹس طارق مسعود نا اعتراض آن پد 9 باسکی بینچ پنا

اسلام آباد :  سپریم کورٹ آف پاکستان اٹ فوجی عدالت آتا برخلاف دائر کروک درخوسات آتا سماعت کروک 9 باسکی لارجر بینچ اِرا جج انا اعتراض آن پد پنا‘ جسٹس قاضی فائز عیسیٰ و جسٹس سردار طارق مسعود اسک سپریم کورٹ پریکٹس اینڈ پروسیجر بل انابابت کیس انا فیصلہ مننگ اسکان متکن آ واکداری تا رد اٹ چیف جسٹس آف پاکستان ناکنڈآن ٹہیفوک بینچ اٹ تولنگ آن نمن مسر‘ جسٹس قاضی فائز عیسی پارے کہ ای دا بینچ ءِ منپنہ‘ نن داڑے سوغند ہرفنگ آن پد بسن‘ کنا دا اعتراض داسہ ناس اف‘ بھلو وخت اسے آن دا کنڈآ شرفمند جج آتا چکار کرفنگ خواہسٹہ‘ دا بابت نوٹ ہم نوشتہ کریٹ ولے بے چکار کننگا۔ تانکہ سپریم کورٹ پریکٹس اینڈ پروسیجر بل انا بابت باندات نافیصلہ مفک چیف جسٹس ناکنڈآن ٹہیفوک بینچ اٹ تولنگ آن بشخنداری خواوہ۔ سردار طارق مسعود پارے کہ ای جسٹس قاضی فائز عیسیٰ نا ہیت آتتون امنائی اٹ۔ اعتزاز احسن و لطیف کھوسہ نا خواست آ چیف جسٹس آف پاکستان پارے کہ دُنکہ بینچ اناارا جج اعتراض کرینو ہندا سوب آن دا بینچ کیس ءِ بنپ تو جوان ءِ‘ نم تولبو نما کیس انا بابت فیصلہ کینہ۔ اوکان گڈ لارجر بنچ کونسل نا ہیت آتے بننگ آن بیدس بش مس ہنا۔پنچ شنبے نا دے دوانزدہ بجہ غان زرس مست چیف جسٹس آف پاکستان ناکماشی ٹی 9 باسکی لارجر بینچ 9 مئی نا واقعہ غاتیان پد ٹہیفوک فوجی عدالت آتا بابت چار جتا جتا درخواست آتا سماعت کن عدالت اٹ بس تو پندار چیف جسٹس جسٹس قاضی فائز عیسیٰ پارے کہ ای گڑاس ہیت کننگ خواوہ‘ روسٹرم آ سلوک وکیل آتیان اعتزاز احسن نا وکیل لطیف کھوسہ پارے کہ نن خوش مرینہ کہ داڑا ہیت مرے‘ جسٹس قاضی فائز عیسیٰ اوڑا ترند مرسا پارے کہ نی پیشن ہن ولدا خوشی کر‘ داڑے سیاسی ہیت کپہ۔ جسٹس قاضی فائز عیسیٰ دا وخت آ پارے کہ ای سوغند ہرفینٹ کہ ای آئین وکانود نارد اٹ تینا زمواری تے پورو کیوہ‘ عدالت آتے سماعت نا واکداری آئین نا ٹک 175 ٹو ایتک‘ کانود اٹ اسہ کانود اس پریکٹس اینڈ پروسیجر ہم ارے‘ دا کانود نا رد اٹ بینچ ءِ بایدے کمیٹی جوڑ کے‘ دَرو بیگہ نا کاز لسٹ ءِ کننگ آن تعجب مس‘ دا کانود ءِ بل انا کہول آ توننگا‘ دا کانود نا فیصلہ انتئے متنے داڑا ہیت کپرہ‘داکان مست مسہ باسکی بینچ اسے نا کماشی ءِ کننگ اٹی اٹ۔قاضی فائز عیسی پارے کہ ای کیس انا بننگ آن بشخنداری کپننگ اٹ‘ ای ہمو وخت اسکان بیچن اسے ٹی تولنگ کپرہ‘ تانکہ پریکٹس اینڈ پروسیجر بل کیس انا فیصلہ مفک‘ ای جج آتیان بشخنداری کیوہ‘ دا بینچ آن بش مننگ اٹی اٹ‘ ولے سماعت آن نمن مفننگ اٹ‘ ای داڑا پین شرہ کننگ کپرہ۔ جسٹس سردار طارق مسعود دا وخت آ پارے کہ ای قاضی فائز عیسی تون امنائی اٹ‘ نن ہمو درخواست آتیا فیصلہ کینہ اول اٹ ہمو درخواست آتا سماعت ءِ کننگے‘ اگہ ہمو کیس اٹ فیصلہ مخ تفی اٹ بریک تو دا کیس اٹ خواست ءِ 8جج امر بننگ کیرہ۔ وکیل سردار لطیف کھوسہ دا وخت آ پارے کہ دا باندات 25 کروڑ الس ناءِ‘ اعتزاز احسن جسٹس قاضی فائز عیسیٰ آن خواست کرے کہ دا اہم ءُ کیس اسے دانا بایدے سماعت ءِ کننگے۔ جسٹس طارق مسعود پارے کہ ہراتم الس نا باندات بس تو ہُرنہ تے‘ داکان انت متو ہمو وخت آ تو ہچ الس نا حق انا ہیت کننگتو۔ چیف جسٹس آف پاکستان داو خت آ وکیل آتے بننگ خواہس تو جسٹس قاضی فائز عیسیٰ بش مس و پارے کہ ای وکیل آتا شرہ ءِ بننگ کپرہ‘ چیف جسٹس وکیل آتے تولنگ ناپارے و عدالتی کارروائی ءِ برخاست کرے۔

(آن لائن)