بلوچستان اسمبلی نا دیوان‘باسک آتا تعلیم‘جانجوڑی بشخ آتا گچینی کن گام گیج کننگ آ زور

کوئٹہ : بلوچستان اسمبلی نا بجٹ دیوان پنچ شنبے نادے تینا پک کروک وخت آن نیم گھنٹہ اس ہُرے آ اسپیکر میر جان محمد جمالی ناکماشی ٹی تلاوت کلام پاک آن بنا کرے‘ اسمبلی ناباسک آک وڈھ اٹ امن وایمنی نا حالیت آتیا گڑتی درشان کرسا پاریر کہ حکومت باندات ءِ گچین وڑ اٹ ایسر کے و ہر کس کہ پرائیویٹ ملیشیاء جوڑ کننگ نا کوشست کننگ اٹی ءِ اونا نوٹس ءِ ہلنگے‘ بلوچستان اٹ تعلیم جانجوڑی‘ ماہی گیری،لائیو اسٹاک تون اوار کل بشخ آتا گچینی کن خصوصی گام گیج کننگ آزور شاغا پاریر کہ مخلوق ءِ بنداوی آسراتی و روزگار فراوان کننگ کن کل دوئی وسیلہ غاتے کاریم اٹ اتنگک وکل علاقہ غاتا پسماندگی ءِ چٹفنگ کن بریبری نابنداو آ فنڈ انا فراوانی ءِ پک کروئی مریک۔ بلوچستان نیشنل پارٹی نا اسمبلی ناباسک میر اکبر مینگل دیوان اٹ اعتراضی ٹک آ تینا خیال آتا درشانی ءِ کرسا پارے کہ وڈھ اٹ امن وایمنی ناحالیت گڑتی ناسوب ءِ‘ منٹ اسے حکومتی کاٹم خواجہی دوئی ءِ ہراکہ رزاکا حالیت آتے خراب کننگ اٹی ءُ ننے سکیورٹی اف ولے اوفتے سکیورٹی تننگ انگ ءِ۔ وڈھ اٹ پرائیویٹ ملیشیا جوڑ کننگ نا نوٹس ءِ ہلنگے‘ بجٹ آ شرہ کرسا او پارے کہ کنا خیال اٹ دا جوان ءُ بجٹ اس اف‘ امن وایمنی آ اخس پیسہ خڑچ کننگ انگ ءِ دافتے بایدے تعلیم آ خڑچ کننگے‘ خیبر پختونخوا تعلیم نا بشخ آ کاریم کرسا شون ہلکنے‘ حکومت تعلیمی پالیسی تننگ اٹ بے سہب مسنے۔ صوبائی وزیر مواصلات و تعمیرات سردار عبدالرحمن کھیتران پارے کہ بلوچستان اٹ امن ءِ خراب کننگ نا سازش کننگ انگ ءِ‘ حکومت وڈھ اٹ حالیت آتیا سنجیدگی اٹ چکار کننگ اٹی ءِ‘ وزیرداخلہ، آئی جی پولیس، آئی جی ایف سی تون اوار بڑزکو کمامدار آک وڈھ آ ہنانو و ای باور کرفوہ کہ اخس کہ قدآور شخصیت ارے حکومت اوفتے شرف ایتک‘ ہر انسان نا رکھ ننا زمواری ءِ حکومت باندات ءِ جوان وڑ اٹ ایسر کننگ ناکوشست کننگ اٹی ءِ‘ نن مکران اٹ ہم امن وایمنی ءِ گچین کینہ۔ بجٹ آ تینا خیال آتا درشانی ءِ کرسا پارلیمانی سیکرٹری بشری رند پارے کہ صوبائی حکومت سختی تیان پد ہم گچین ءُ بجٹ اس پیش کرینے‘ نزوریک ہر محکمہ ٹی مریرہ‘ داسہ ہم بھاز آ علاقہ غاتے ٹی گچینی نا گنجائشت ارے۔ صوبائی حکومت بجٹ اٹ سَد آ پوسکن آ اسکول آتا تفنگ و اپ گریڈیشن نا ڈٹ ءِ اوار کرینے۔ حکومت کچ اٹنگاوسیلہ غاتے ٹی ہر بشخ آ چکار کرینے‘بایدے بجٹ ناستاءِ کننگے۔داکان گڈ ڈپٹی اسپیکر سردار بابر موسی خیل اسمبلی نا دیوان ءِ اینو سہب انا یانزدہ بجہ اسکان پد بٹے۔

(آن لائن)