نوازشریف گچین کاری مہم آخا تحریک کن بننگ ءِ‘جاوید لطیف

اسلام آباد : بنجائی وزیر میاں جاوید لطیف پارینے کہ نوازشریف گچین کاری مہم کن آخا بلکہ گچین کاری تحریک کن بننگ اٹی ءِ‘ قاضی فائز عیسیٰ نا ساڑی گری ٹی واٹس ایپ آ کمیشن جوڑ مننگ کپک‘ 9 و 10مئی ناواقعہ غاتا زموار تتون ہچ رعایت کننگ مفک‘ اسلام آباد اٹ پریس کانفرنس کرسا بنجائی وزیر جاوید لطیف پارے کہ 9 و 10مئی ناواقعہ غاتا زموار تتون ہچ رعایت کننگپک۔ پی ٹی آئی کارندہ غاتے وگائفنگا‘ 9مئی آ شرپسند آک ریاستی ادارہ غاتے شست کریر‘ اسہ بندغ اس ہرانا پن عمران خان ءِ اونا مچ آ ڈٹ بندی بے سہب مس۔ جاوید لطیف پارے کہ نواز شریف تینا دور اٹ بجلی نا پلانٹ خلک‘ لوڈ شیڈنگ ءِ چٹفے‘ مخلوق ءِ داسہ ہم اومیت ارے کہ نوازشریف بریک و ملک ءِ تارمئی تیان کشک، نواز شریف ملک ءِ سی پیک تس ولے بدبختی اٹ پی ٹی آئی حکومت دا ڈٹ ءِ تورے، سی پیک اتوک آتتون ہرا سلوک کننگا اودے مچ آ قوم خنا‘ 2013ٹی ملک اٹ بے روزگاری بے ایمنی ئس‘ نوازشریف بس تو بے روزگاری ءِ چٹفے‘ نواز شریف تینا دور اٹ کبینی ءِ چار درسَد آ ایس‘ ملک اٹ انڈسٹری خلک او پارے کہ نوازشریف گچین مہم کن آخا گچین کاری تحریک کن پدی بننگ اٹی ءِ‘ دا وار گچین کاری تے ٹی سندھ اٹ ہم مسلم لیگ ن سرسہب مریک‘ نوازشریف آن اومیت کننگ مریک کہ او ملک ءِ دا مین آن کشک‘ الس نوازشریف ءِ اِرا تہائی ٹی سرسہب کرے تو ملک ءِ سوگو کننگا۔ جاوید لطیف پارے کہ نوازشریف پاکستان ءِ سی پیک تس‘ سی پیک گیم چینجر اس ئس‘ سی پیک اتوک نوازشریف تون جوان سلوک کننگتو۔ او مستی پارے کہ مخلوق ءِ اومیت ارے کہ نوازشریف بریک و شونہالی اتیک‘ وونٹ انا شرف بیرہ وونٹ بٹنگ اف نتیجہ ءِ امنا کننگ وونٹ ءِ شرف تننگ ءِ۔ جاوید لطیف پارے کہ نوازشریف ناکماشی ٹی ہمو پاکستان رسینگک ہراٹی کبینی مفک۔ اوپارے کہ جسٹس قاضی فائز عیسیٰ نا ساڑی گری ٹی داسہ واٹس ایپ آ کمیشن جوڑ مفک‘ اونا تعیناتی آن بے باوری نا چاگڑد چٹانے۔

(آن لائن)