عمران خان کارندہ غاتے ریاست آ جلہو نا پارے، خواجہ آصف

اسلام آباد: وزیردفاع خواجہ محمد آصف پارینے کہ عمران خان تینا ورکرآتے ریاست آ جلہو نا پارے۔ دا ڈوہ اٹی اوار گڑاس مخلوق نا فوجی عدالت آتیٹی ٹرائل مریک، فوجی عدالت آتیٹی ٹرائل پوسکن ءُ ہیت اس اف، مستین اٹ ہم داوڑ مرسا کرینے، شہید آتا یات گار آتون انتس کہ کننگا، اونا دُوارہ پارسا ہم شرم بریک، جی ایچ کیو نا گیٹ آ پیٹرول بمب جوڑ کرسا جلہو کروک آتا کس اس امر دفاع ءِ کننگ کیک، پارلیمنٹ نا دنگ اٹ نیام تموک آتے دا ایوان آن پیدوار ءُ کلہو اس رسینگے۔ پنچ شنبے نادے آ قومی اسمبلی ٹی گپ وتران کرسا وزیردفاع خواجہ محمد آصف پارے کہ فوجی عدالت آتیٹی ٹرائل نا بابت باندات نا سپریم کورٹ اٹی سماعت بناکننگ ءِ، فوجی عدالت آتیٹی ٹرائل اولیکو وار مفننگ ءِ، تدوک آ حکومت نا دور اٹی 24 یا 25 مخلوق ءِ سزاہم مس۔ مستین اٹ عدلیہ نا کنڈآن دادے پک ہم کننگا۔ دا ایوان وار وار آ داہیت انا درشانی ءِ کرینے کہ ادارہ غاک اسہ ایلو نا دنگ آن گدرینگپس، ادارہ غاتا نیام اٹ جھیڑہ ملک اکن نیک بختی اس مفک۔ اوپارے کہ فوجی عدالت آتیٹی ٹرائل پوسکن ءُ ہیت اس اف، ویل ءِ ہرافک عدالت آتیا دریر اوفتا سیاسی مسخت ءُ، اوفتا اصل شکوہ و گلہ تینا جما عت آتون ءِ، اوفتے اگہ اوفتا جماعت نا کنڈآن چکار دوئی مفننگ ءِ داٹی ننا ہچ ءُ قصور اس اف۔ خواجہ محمد آصف پارے کہ گڑاس نا ڈوہ انا گھناؤنا پن ءِ ہم خنان، گڑاس مخلوق نا فوجی عدالت آتیٹی ٹرائل مریک، عمران خان ریاست آ جلہو نا تینا مخلوق ءِ رغاما، شہید آتا یات گار آتون انتس کہ مس اوفتے دُوارہ پارساہم شرم بریک، میانوالی ایئر بیس آ اگہ نسخان اس مسکہ تو انت پاننگاکہ، دا جہاز آتے تو ہندوستان نشانہ کننگ نا خواہندار ءِ، اسہ بندغ اس پیٹرول بمب جوڑ کرسا جی ایچ کیو نا درگہ غا خسک اونا دفاع ءِ دافک امر کننگ کیرہ، دا فتے غٹ چارہ۔ سیاسی مسخت آتیکن ملک انا عزت و شرف ءِ چیلنج کپ، داوڑنا مخلوق و عدلیہ غان خواست ءِ کہ گڑاس تو لحاظ کیر، ہندن ءُ میرات ہلر کہ ہرافتے یات تخنگے، دُن مف کہ تاریخ دافتے فراموش کے۔ اوپارے کہ ہڑدے دہشت گردی نا جنگ اٹ شہیدی مننگ ءِ، دافک ملک انا سالمیت و بقاکن تینا دتر ءِ تننگءُ۔ دا ننا محسنک ءُ۔ اوپارے کہ شہید آتا یات گار و آبرو ءِ شکست کننگ و سوب جھیڑہ جوڑ کننگ آن ود ہچ ءُ ڈوہ اس مفک۔

(اے پی پی)