سویڈن اٹ قرآن پاک نا بے حرمتی آ وزیراعظم نا ترند مذمت

اسلام آباد/ کوئٹہ: وزیراعظم شہباز شریف پارینے کہ سویڈن اٹی قرآن پاک نا بے حرمتی نا واقعہ نا ترند مذمت ءِ کینہ، تینا بیان اٹی او پارے کہ دا کاریم نا اخس کہ مذمت کننگے ہموخس کم ءِ، دا سگنگ نوڑ انا کاریم اس ہم اف۔ سویڈن اٹی قرآن پاک نا بے حرمتی نا پراگندہ غا کاریم ءِ اخس کہ شیف خلنگے کم ءِ۔ آجو سلاہ درشانی نا پڑدہ ٹی مسلمان تا جوزہ غاتے لتاڑ کننگ نا موکل تننگ مفک۔ داکان مست ترجمان دفتر خارجہ ہم واقعہ نا ترند انگا لوز آتیٹی مذمت ءِ کرسا پاریسس کہ مسلمان تا مذہبی جوزہ غاتے لتاڑ کننگ سلاہ درشانی نا آجوئی اس اف۔ دفتر خارجہ نا پاننگ ئس کہ انسانی حق آتا علم بردار آتے بیداد آ وگائفوک آتے توننگ کن زمواری تے پورو کروئی تمک۔ ہندن صوبائی وزیر داخلہ میر ضیا اللہ لانگو سویڈن اٹی قرآن پاک نا بے حرمتی نا واقعہ نا ترند انگا لوز آتیٹی مذمت ءِ کرینے۔ اسہ بیان اسے ٹی وزیر داخلہ پیدوار وڑ اٹ پارے کہ واقعہ غان مچ آ دنیا ٹی مسلمان آتا است آزاری مسنے، ہرانا سوب آن عالم اسلام بھاز خار اٹی ءِ۔ او پارے کہ دنیا ٹی ہچ ءُ مذہب و مقدس کتاب اسے نا توہین کننگ نا موکل تننگ مفک، ودا وڑ انگا کاریم ناروائی اسے۔ وخت اس کہ اسلام ہچ ءُ مذہب اسے توہین نا موکل تفک۔ او پارے کہ دا واقعہ مسلم امہ نا برخلاف اسہ سازش اسے، وخت اس کہ اسہ خاص ءُ ٹولی اسے نا دا وڑ انا کننگ آ انسانی حق آتا ادارہ غاتا چپی اسُل گڑتی نا سوب ءِ۔ مذہب و مقدس ہند اسے نا بے حرمتی آن جہانی امن ءِ گڑتیک پلویڑ کننگ کیرہ۔ سویڈن حکومت نا زمواری ءِ کہ بے ایمنی تالان کروک آتا برخلاف سخت کارروائی کے۔ او پارے کہ بلوچستان حکومت ہر فورم آ دانا برخلاف توار چست کیک۔

(آن لائن)