بی این پی بے گوا تا بابت ویل آ سمجھوتہ کپک، ملک نصیر شاہوانی

کوئٹہ: بلوچستان نیشنل پارٹی نا بلوچستان اسمبلی ٹی پارلیمانی لیڈر ملک نصیر احمد شاہوانی تون اوار ایلو راہشونک صوبہ غان بندغ آتے بے گوا کننگ نا مذمت ءِ کرسا پارینو کہ عبدالخالق قمبرانی تون اوار کل بے گوا بندغ آتے پاش کرسا کرک و وسیلہ غاتیا الس نا حق حاکمیت ءِ امنا کننگے۔ بی این پی تینا بندغ آتا حق آتا دوئی کننگ آ ہچ ءُ سمجھوتہ اس کپک۔ بلوچستان نا ویل ؤتا ایسری بے گوا بندغ آتا پاش کننگ و ہیت و گپ نا کمک اٹ ایسر مننگ کیک۔ دا ہیت آتے اوفک تدوک آ دے پارٹی نا کنڈ آن عبدالخالق قمبرانی نا بے گواہ کننگ نا برخلاف کوئٹہ پریس کلب نا مون آ کروک برانزی مچی آن تران کرسا کریر۔ دا وخت آ بی این پی نا راہشون میر غلام نبی مری، موسیٰ جان بلوچ، ڈاکٹر علی احمد قمبرانی، شمائلہ اساعیل تون اوار ایلوفک ہم تران کریر۔ برانزیک بینر ہم ہرفیسر ہرافتیا عبدالخالق قمبرانی نا بے گوا کننگ نا برخلاف نعرہ درج ئسکہ۔ برانزی تیان تران کراس ترانکار آک پاریر کہ مسکوہی ڈکٹیٹر پرویز مشرف نا دور اٹی بلوچستان نا سفید ریش نواب اکبر بگٹی ءِ شہید کرسا بلوچ ورنا تے بے گو کننگ نا بنا کروک چرجوئی اینو ہم برجا ءِ۔ و حکمران آک زور انا زی آ کل ویل آتے ایسر کننگ خوارہ۔ ہراٹی اوفک ہر جاگہ غا بے سہب ہم مننگ اٹی ءُ۔ مخلوق ءِ بے گوا کننگ و لاش تے خسنگ انگ ءِ۔ بی این پی مدام دن انگا ناروائی تا برخلاف توار چست کرینے، و ہر فورم آ اوفتا برخلاف برانز کرینے، وحکمران آک بے گوا تا بابت پارہ کہ دا بندغ آک اوغانستان یا پین جاگہ اس ڈکوک ءُ، ولے توتک واقعہ غان پد ورنا تا رسینگوک لاشک حکمران آتا بُوز آ چپانٹ اس ئسرہ، کہ دا ورناک اوغانستان آخا ہنداڑے ئسر، و اوفتا لاشک توتک آن خننگار، دا بابت کمیشن نا رپورٹ ءِ ہم ریکارڈ آن ہرفنگا۔ ہر کمیشن نا رپورٹ حمود الرحمان کمیشن نا رپورٹ آنبار گم کننگانے۔ و ہچ مونی اتنگتنے۔ اسلام آباد ہائیکورٹ نا پرمان آ پارٹی سروک سردار اختر جان مینگل نا کماشی ٹی جوڑ کمیشن ٹہیفنگا، ہرا تینائی تتون اوار تعلقدار بندغ آتتون اوڑدہی ہم کرے تاکہ بے گوا تا ویل ءِ ایسر کننگ اٹ کمک رسینگ کے۔

(آن لائن)