بلوچستان نا ویل آتا ایسری کن حقی بندغ آتا نمائندگی ءِ پک کننگے

سیاسی و زرگزرانی حالیت آتا گچینی کن کل ءِ اسٹ مرسا کڑد ادا کروئی تمک، جند انا فائدہ و کرینگ نا سیاست بایدے داسہ ایسر مرے،مست انا ردینک آتیان ہیل کروئی تمک، شاہد خاقان عباسی/مفتاح اسماعیل

0

Get real time updates directly on you device, subscribe now.

کوئٹہ : مسکوہی وزیر اعظم پاکستان شاہد خاقان عباسی، مسکوہی وزیر خزانہ مفتاح اسماعیل اسک پارینو کہ الس نا ویل آتا ایسری کن بلوچستان آن سیاسی جماعت آتے بیدار کننگ نا بنا کرینن، بلوچستان نا ویل آتا ایسری کن حقی بندغ آتا نمائندگی ءِ پک کننگے۔ سیاسی و زرگزرانی حالیت آتا گچینی کن کل ءِ اسٹ مرسا کڑد ادا کروئی تمک، جند انا فائدہ و کرینگ نا سیاست بایدے داسہ ایسر مرے،مست انا ردینک آتیان ہیل کروئی تمک، آئین آ پورو آن پورو عمل مس تو سیاسی سوگوی نا سوب مریک، خرابی تا زموار نن کل اُن، پارلیمنٹ اٹ الس نا حق آتا دوئی کننگ و ویل آتا ایسری کن تینا کڑدار ءِ ادا کین، ساڑی سیاسی دور اٹی الس نا حقی بنداوی ویل آک پد تمانو۔ اوفتے پیدوار کرسا سیاسی جماعت آتے تینا قبلہ ءِ درست کننگ کن گام گیج کروئی تمک۔ دا ہیت آتا درشانی ءِ اوفک بلوچستان پیس فورم نا سروک نوابزادہ حاجی لشکری رئیسانی تون اوار یک شنبے نا دے کوئٹہ پریس کلب اٹی اسیجا پریس کانفرنس نا وخت آ کریر۔ دا وخت آ سینیٹر مصطفی نواز کھوکھر، مسکوہی بنجائی وزیر میر ہمایوں عزیز کرد اسک ہم ساڑی ئسر۔ مسکوہی وزیر اعظم شاہد خاقان عباسی پارے کہ تدوک آ دے السی ویل آتا ایسری کن اسیجائی جدہ و حکمران آتتون اوار سیاسی جماعت آتے دا کنڈ آ چکار کرفنگ کن سیمینار اسے ٹی سرجم ہیت و گپ مسنے کہ ساڑی سیاسی نظام ملک و قوم انا ویل آتا ایسر کننگ نا بود تخپک۔ اینو سیاست اسہ ایلو ءِ کرینگ تننگ نا وڑ اس جوڑ مسنے۔ و ننا کوشست دادے کہ سیاسی جماعت آتیان چَپ اسہ فورم اس مرے ہرانا کمک اٹ الس نا ویل آتے ایسر کننگ کن ہیت و گپ مننگ کے۔ داڑکن بلوچستان آن بنا کننگانے۔ نیشنل ڈائیلاگ ری امیجنگ نا بروک آ سیکشن پشاور اٹی مریک۔ دا سیمینار نا کمک اٹ پوسکن آ پاکستان نا گمان آ عمل کرسا نن تینا زرگزرانی، سیاسی حالیت آتے گچین کینہ۔ انتئے کہ ویل و خواریک ودنگ اٹی ءُ۔ ملک زرگزران نا بابت آن بیدس ہم ایلو ویل آتا ہم پلویڑ اٹ بسنے، و الس نا ویل آتا ایسری کن غیر جماعتی فورم اسے نا گرج مس، و دا رد اٹ نن بنا اس کرینن، و نن ایلو فورم آتیا ہم ویل آتا ایسری کن ہیت کینہ۔ انتئے کہ سیاسی چک و تاڑ ویل آتا ایسر اف، نن اسیجا مرسا الس ءِ دا ویل آتیان خلاس کننگ کینہ۔ انتئے کہ تدوک آ چار و نیم سال یا بیست سال انا بنداوی نزوری تے 8 تُو اٹ چٹفنگ مفک، وخت اس کہ کاریم نا بنا ءِ کرسا جوان ءُ کنڈ اسے آ مون کننگ مریک۔ ای وزیر اعظمی نا دے تیٹی مشترکہ مفادات کونسل اٹی پاریٹ کہ بجلی و گیس انا باندات آتے صوبہ نا دوٹی تننگے، صوبہ گیس و بجلی نا فراوانی ءِ تیان کمپنی تا کمک ءِ پک کے۔ او پارے کہ او پارے کہ عدلیہ میاں محمد نواز شریف تون بھاز بے انصافی کرے، عدلیہ نا غلط فیصلہ غاتا پد ءِ اینو نن سگنگ اٹی اُن۔ عدلیہ نا کاریم ءِ کہ او فیصلہ غاتے ہُرے، و معاہدہ غاتتون اوار اوار سیاست دان تے ہم ایلو گڑا تے گچین کننگ کن گام گیج کروئی تمک۔ بلوچستان نا ویل آتا ایسر قرار داد اف، بلکن اوکان پد انا باندات آتے ہم پک کروئی تمک، ہرافک کہ دا ویل آتا ایسری کن کسر اس کشنگ کیر۔

(آن لائن)

Get real time updates directly on you device, subscribe now.

Leave A Reply

Your email address will not be published.