(اصطلاحات نثر (34
غفور جان ساسولی
Get real time updates directly on you device, subscribe now.
ٹیٹرالوجی:۔ (Tetrology)
ہمو سرجم آ ادبی کاریم ہراٹی اسہ ڈَول برجا نوشت آک ساڑی مریر۔
ٹیٹرالوجی یونانی لوز Tetra غان پیش تمانے، ہرانا معنہ ”چار“ ءِ۔ و یونانی لوز Tetroheron نا رد اٹ دادے ”چار انا برجا دروشم“ پاننگک۔
مسکوہی یونان اٹی دا اصطلاح ہمو راگ اکن کاریم اٹ اتنگانے، ہراٹی اول سر مسہ مونجا و ملول ءُ بشخ، و ہندن مونی اسہ پین بشخ اس بوگ شوگ انا وڑ اٹ اوار کننگاکہ۔
متروک لوز آک:۔(Redundancy)
ہمو لوز آک ہرا متروک (اِلنگوک) مریر، اوفتا کاریم اٹ اتنگ ءِ Redundancy پاننگک۔
براہوئی نا متروک مروک لوز آتے پروفیسر ڈاکٹر لیاقت سنی تینا کتاب ”براہوئی لوز آتا چاہنداری“ ٹی بھاز گچینی اٹ مون آ ایسنے۔ دا لوز آک کتابی دروشم ہلنگ آن مست ”تلار“ اٹ شینک مرسا کریر۔ ہندن عبدالغفور محمد شہی نا کتاب ”اسپیدہ رنگ“ اٹی ہم بھاز ہندن ءُ لوز اریر، ہرافک اینو پگہ کاریم اٹ اتنگپسہ، و گیرام کننگانو۔ دا نوشتوک آک دا وڑ کرسا براہوئی زبان نا متروک مروک آ لوز آتے زندہ کرینو۔ داکان مست ڈاکٹر عبدالرحمن براہوئی نا کتاب ”براہوئی نامہ“ ہرا اولیکو وار 1978ء اٹی شینک مس، اوٹی ہم متروک و مخصوص آ لوز آتے مچ کرسا کتابی دروشم اٹی اتنگاسس۔ پروفیسر عزیز مینگل نا ”اردو براہوئی لغت“ اٹی ہم دا لوز آتا بھلو کچ اس ساڑی ارے۔ ہندن اسلم بنگلزئی نا کتاب ”براہوئی مڈی“ ٹی ہم متروک لوز آتیان بھلو کچ اس زندہ کننگ نا کوشست کننگانے۔
جرنل:۔ (Journal)
جرنل ہمو رسالہ ءِ پارہ ہراٹی گیشتری پٹ و پولی ءُ نوشتانک و مقالہ مریرہ۔ جرنل اٹی ساڑی مقالہ غاک ایم فل، پی ایچ ڈی نا رد اٹ مریرہ یا اوفک اسہ خاص ءُ سرحال اسے تون تعلقداری تخوک مریرہ۔ کہ ہرا پورو وڑ و ڈَول اٹ پٹ و پولی اسلوب نا دروشم اٹی درشان کننگرہ۔
ہفتئی تلار
تاک: 38
03-09 Oct, 2020
پنہ: 06