سیرت سرور کائناتؐ(35)
حاجی شاہ بیگ شیدا
Get real time updates directly on you device, subscribe now.
سابِقین و اولین اوڑان پد انا مسلمانکؓ
حکم ءِ ہندا بنگ خواجہ او اُرا غا مون کرے
دعوت ءِ توحیدِ ہندا او اُرا غان شون کرے
ایس ایمان بن خدیجہؓ مست کلّ آن پاکباز
مس مسلمان اولیکو خواجہؐ تو خوانا نماز
ئس علیؓ چنکا تیٹ کہ خواجہؐ مس ایمان نا
حکم ءِ مَنّا او خدا نا، خواجہؐ نا، فرمان نا
ئس باتی زیدؔ اُرا نا رب ءِ مسک او قبول
مےؓ ءِ ہندا مڷ کریسُس چارے اللہ نا رسولؐ
صِدق اتون ولدا صفا غا مس ابوبکرؓ ہم نشین
پارے آمنّا نبی ءِ مس گواہ حقُ المُبین
پارے خواجہؐ نے کن قربان لُمہ باوہ تون کنا
ای گواہی ایتوہ کہ پاوہ اُست اٹ لا الٰہ
نی نبی آخر زمان اُس رب انا نی اُس رسولؐ
صِدق اتون چاسہ صفا غا ای کریٹ دادے قبول
نی کنے پا خواجہؐ داسہ انت کاریم ءِ کنا
خواجہؐ پارے دعوت ایتے، کم کہ باریم ءِ کنا
زند ءِ مُچ آ تِس تیناؓ خواجہؐ نا یاری ٹی اوؓ
آسرات آ زند ءِ شاغا دین اکن خواری ٹی اوؓ
محنت آن تے دین حق ءِ بھاز ملا فائدہ
مس کوپہ خواجہؐ نا او گر ہلینک جائزہ
بس عثمانؓ تون زبیرؓ ہم عبدالرحمنؓ دعوت اٹ
اُست اتون لگار دا ہم دین حق نا خدمت اٹ
مس مسلمان ہم عبیدہؓ عامرؓ و ارقمؓ خنار
دُن ابو سلمہؓ ابوذرؓ دین حق آ دا ہنار
بس سعدؓ ہم بس طلحہؓ ہم لا الٰہ پارسا
اُست اٹ ایسُر دافک ایمان دین حق ءِ مارسا
بس عمارؓ ہم بس بلالؓ ہم اوتتون بسک خبابؓ
ئس صہیبؓ دا ہم غلام آک دین اکن مسُر عذاب
عثمانؓ تون بس قدامہؓ عبداللہؓ دا ایلم آک
عبداللہؓ مار ئس مسعودؓ نا بس عبیدہؓ پُر تپاک
فاطمہ ایڑھ ئس عمرؓ نا کل مسنک ہم خواجہؐ نا
چِل اسے نا کچ بسُر دین اٹی اے راج انا
چُپ چُپی اٹ ئسکہ دافتا تبلیغ سہب شام
اوفتیان راضی ارے رب اوفتے کینہ نن سلام
ڈکوئی اٹ دا کریرہ دُن عبادت وا نماز
تین پہ تین کہ مسُّرہ او بن! اسٹ ئس اوفتا راز
دافک ارقمؓ نا اُراٹی درس ہلکُر دین اکن
وخت بسک کاٹم آتا جان ءِ تِسُر دین اکن
دُن مُسہ سال دین حق نا کاریم ئسک راز اٹی
مس خبر داڑان قریش ءِ تما پرپٹ بھاز اٹی
پین چندی تا رجوع مس دین حق آ کہ دم اس
لگا خاخر دُن قریش اٹ مس اوفتے کن غم اس
ہفتئی تلار
تاک: 11
19-13 فروری 2021ء
پنہ: 05