ساوتھمپٹن و مانچسٹر نا کنڈیشن آک پاکستان نا حق اٹی ءُ‘ ثقلین مشتاق
لاہور( آن لائن) پاکستان کرکٹ ٹیم نا مسکوہی اسپنر ثقلین مشتاق قومی ٹیم نا دورہ انگلینڈ نا بابت اٹ پارینے کہ ساوتھمپٹن و مانچسٹر نا کنڈیشن آک پاکستان نا حق اٹی ءُ۔ اسہ انٹرویو سے ٹی منہ وخت اٹ پی سی بی نا ہائی پرفارمنس سینٹر اٹ انٹرنیشنل پلیئرز ڈیولپمنٹ نا کماش گچین مننگ آ ثقلین مشتاق پارینے کہ ویسٹ انڈیز و پاکستان نا ٹیم تا دورہ انگلینڈ کرکٹ نا بحالی کن بھلو گام گیج اسے۔ مسکوہی آف اسپنر پارینے کہ داٹی ہچ ءُ شک اف کہ دا وخت نہ بیرہ گوازی کن سخت ءِ وخت اس کہ کووڈ-19 مچ آ دنیا ٹی زندگی ءِ بدل کرینے۔ او پارینے کہ دا سخت انگا حالیت آتیٹ پاکستان کرکٹ سیریز کن انگلینڈ نا دورہ ءِ کرسا تاریخ اس رقم کننگ کن ہننگ اٹی ءِ۔