شام انا وتواجہی، سیوت و علاقائی سلامتی نا مخ تفی ءِ برجا تخنہ،پاکستان نا پڑو

اسلام آباد، اسلامی جمہوریہ شام انا وزیر خارجہ اسعد حسن الشیبانی وزیراعظم محمد شہباز شریف تون اوڑدہی کرے، ہراٹی پاکستان و شام انا نیام اٹی تاریخی وایلمی تعلقداری، ہڑتوم آ کنڈانا کمکاری نا شون، شام انا سیاسی حالیت، تفوئی کاریم و ڈیہہ انا باندات آتیا گپ وتران کننگا۔ وزیراعظم محمد شہباز شریف شامی وزیر خارجہ و اونا ڈل ءِ بخیر کرے و شام انا صدر احمد الشرع کن نیک استخواہی تا درشانی ءِ کرے‘ وزیراعظم صدر احمد الشرع تون تینا زوت آتیٹ مروک اوڑدہی تا ذکر ہم کرے۔ اوڑدہی نا دوران وزیراعظم شام انا وتواجہی‘ سیوت و علاقائی سالمیت کن پاکستان نا نزور مفروک مخ تفی نا دوارگی ءِ کرے۔ اوپیدوار کرے کہ پاکستان شام انا سیوت و وتواجہی نا موقف نا مخ تفی ءِ برجا تخک۔ وزیراعظم شہباز شریف پاکستان و شام انا نیام اٹی تاریخی، کڑمب و متکن آ سنگتی تعلقداری تا ذکر کرسا پارے کہ ہڑتوم آ ملک آتے تینا ایلمی تعلقداری تے جتا جتا بشخ آتیٹی عملی کمکاری ٹی بدل کروئی تمک۔ او پارے کہ پاکستان و شام انا نیام اٹی سیاسی، دفاعی، واپاری‘ زرکاری‘ تعلیم و انسانی وسیلہ غاتا شون تننگ تون اوار جتا جتا بشخ آتیٹی کمکاری نا بھلو وارخواہی ارے۔ ہراڑان ہڑتوم آ ملک آتا الس ءِ فائدہ رسیفنگ مریک۔وزیراعظم ہڑتوم آ ملک آتا نیام اٹی زرگزرانی و واپاری روابط پین ودفنگ نا گرج آ زور شاغا تاکہ ہڑتوم آکنڈ انا تعلقداری تے اسہ سوگو ءُ زرگزرانی بنداو اس فراوان کننگ مرے۔ وزیراعظم پاکستان و شام انا نیام اٹی دراست فلائٹ نا بحالی ءِ اہم گوندسا پارے کہ داڑان ہڑتوم آ ملک آتا الس نا نیام اٹی رابطہ اٹی ودکی مریک‘ او پارے کہ دراست فضائی رابطہ نا بحالی آن پاکستان آن بھلو کچ اسے ٹی شام آ ہنوک آ زائر آتے ہم آسراتی رسینگک و ہڑتوم آ ملک آتا الس نا نیام اٹی رابطہ پین سوگو مریک۔ وزیراعظم محمد شہباز شریف شام انا وتواجہی و علاقائی سالمیت تون اوار گولان نا مش تا باندات آ ہم شام انا موقف نا پبی مخ تفی نا دوارگی ءِ کرے۔