مولانا فضل الرحمن و محمود اچکزئی نا اوڑدہی، متحدہ اپوزیشن جوڑ کننگ نا فیصلہ

اسلام آباد، جمعیت علماء اسلام (ف) نا سروک مولانا فضل الرحمان قومی اسمبلی ٹی قائد حزبِ اختلاف محمود خان اچکزئی تون اپوزیشن چیمبر اٹی اوڑدہی کرے، ہراٹی ملک انا ساڑی سیاسی حالیت، پارلیمانی باندات‘ اپوزیشن جماعت آتا تین پہ تین کمکاری و آخبت نا سیاسی سُج پام آ خوڑتی اٹ گپ وتران کننگا۔ اوڑدہی ٹی پاکستان تحریک انصاف نا بنجائی راہشون و مسکوہی اسپیکر قومی اسمبلی اسد قیصر ہم ساڑی ئس‘ وخت اس کہ جے یو آئی (ف) نا ڈل اٹی قومی اسمبلی نا باسک عثمان بادینی، سینیٹر کامران مرتضیٰ، سینیٹر مولانا عبدالواسع و مولانا کمال الدین اوار ئس۔ اپوزیشن نا کنڈ آن پارلیمانی لیڈر شاہد خٹک، چیف وہپ ملک عامر ڈوگر، قومی اسمبلی ناباسک عاطف خان، شہرام خان تراکئی، ثناء اللہ مستی خیل و علی اصغر خان، صوبائی اسمبلی نا باسک آصف خان محسود و تحریک تحفظ آئینِ پاکستان نا ترجمان اخوندزادہ حسین یوسفزئی ہم ساڑی ئس۔ اوڑدہی نا وخت آ بانی پی ٹی آئی عمران خان نا جانجوڑی نا بابت گڑتی نا درشانی کننگا۔ اپوزیشن راہشونک خواست کریر کہ سپریم کورٹ نا فیصلہ نا رد اٹ عمران خان ءِ دمدستی ہسپتال آ گدریفنگے و اودے درمان نا جوان آسراتی فراوان کننگے۔ اپوزیشن راہشونک پاریر کہ مسکوہی وزیراعظم نا جانجوڑی نا باندات آ بایدے ہچ ءُ وڑ اسے نا سیاست مف بلکن انسانی و طبی بنداو تیا اودے دمدستی و کڑزوک درمان نا آسراتی فراوان کننگے۔ دیوان اٹی قومی اسمبلی و سینیٹ اٹی اپوزیشن تون حکومت نا رویہ و وڑوڈول تیا ہم گڑتی نا درشانی کننگا۔ اپوزیشن راہشونک پاریر کہ جمہوریت اٹی اپوزیشن نا توار ءِ خف توننگک‘ اودے بے چکار کننگپک۔ اوڑدہی ٹی حکومت نا پالیسی، پارلیمنٹ اٹی اپوزیشن نا کڑد و آئین و جمہوریت نا رکھ اکن آخبت نا سُج پام آ ہم سجفنگا۔ مولانا فضل الرحمان و محمود خان اچکزئی اپوزیشن جماعت آتا تین پہ تینی رابطہ غاتے پین بھرمی جوڑ کننگ و پارلیمانی کہول آ اسیجائی سُج پام تینائی کننگ نا باندات آتیا گپ وتران کریر۔ اوڑدہی ٹی اپوزیشن جماعت آتا نیام اٹی پین سلابت برجا تخنگ و اسیجائی سج پام ٹہیفنگ آ امنائی کننگا۔ اوڑدہی آن پد میڈیا تون ہیت وگپ کرسا مولانا فضل الرحمان پارے کہ اپوزیشن جماعت آتتون اینو اولیکو تولشت مسنے و فیصلہ کننگانے کہ متحدہ اپوزیشن اس جوڑ کننگے۔ او پارے کہ دا اولیکو تولشت ئس، مستی سلاہ ہم مریک‘ کل اپوزیشن جماعت آک اوار مرسا و اسہ جاگہ غا اپوزیشن کیرہ۔ مولانا فضل الرحمان نا رِداٹ اپوزیشن جماعت آتا نیام اٹی رابطہ غاتے مونی دننگک و اسیجائی سُج پام تینائی کننگک۔ او مستی پارے کہ آل پارٹیز کانفرنس نا اڈ تننگ نا باندات آ ہم بایدے ہیت مرے۔