حوثی جلہو اٹی ٹھپی مروک 6 پاکستانی ملاح رکھوک وڑ اٹ پدی سرمسنو، اسحاق ڈار

اسلام آباد، نائب وزیراعظم و وزیر خارجہ سینیٹر محمد اسحاق ڈار پارینے کہ زوت آتیٹ حوثی جلہو اٹی ٹنزانیہ نا بیرک والا واپاری بحری جہاز آ ٹھپی مروک شش پاکستانی ملاح رکھی وڑ اٹ وطن آ پدی سرمسنو وخت اس کہ زوال مروک اِرا پاکستانی ملاح تا میت آتے ہم پاکستان آسرکننگانے۔ راجی رابطہ نا پلیٹ فارم ایکس آ تینا بیان اٹی او پارینے کہ غٹ تعلقدار فریق آتے پارت کننگاسس کہ ٹھپی ملاح و زوال کروک آتا میت آتا رکھ، شرف اٹ و زوت آن زوت وطن آ پدی اتنگ ءِ پک کننگے۔ نائب وزیراعظم جدہ ٹی پاکستان نا قونصلیٹ جنرل و ریاض اٹی پاکستانی سفارت خانہ نا وخت آ و است انا سِخت اٹ کروک کوشست آتا ستاءِ کرینے ہراکہ یمن آن ٹھپی ملاح و میت آتا پدی اتنگ و اوکان پد اوفتا پاکستان سفر اٹی آسراتی فراوان کریر، خاص وڑ اٹ دا حالیت آتیٹی ہراتم یمن اٹی پاکستان نا ہچ ءُ سفارتی مشن اس اف۔ نائب وزیراعظم و وزیر خارجہ سینیٹر محمد اسحاق ڈار پارے کہ ای ایف آئی اے تون اوار کل تعلقدار فریق آتا کوشست آتا ہم ستاءِ کیوہ ہرافتا سوب آن اوفتا پاکستان اٹی بننگ و اوکان پد بست و بند جوانی اٹ پورو مس۔ نائب وزیراعظم پارے کہ ای سعودی وزارت خارجہ نا کمکاری نا ہم است انا ہب اٹ ستاءِ کیوہ خاص وڑ اٹ جدہ ٹی تروک طبی کمک و ایلو بست و بند آتیا اوفتا منت واری ءِ ہرفوہ۔ او پارے کہ پاکستان دا جلہو نا سخت انگا لوز آتیٹی مذمت ءِ کیک و دا ہیت انا درشانی ءِ کیک کہ سمندری مسافر و ملاح تا رکھ و سلامتی ءِ پک کننگے۔ نائب وزیراعظم پارے کہ نن ٹھپی ملاح و پدخاہوت آتتون ہر وڑ انا کمک کننگک۔