ایران نا کنڈ آن گڑتی، باسک ملک آتا رکھ اکن سنبرینگوک اُن،نیٹوعہدیدار

برسلز، یورپی ملک آتا سیوت نیٹو پارینے کہ او ایران نا کنڈ آن باسک ملک آتے مون تروک خلیس نا مون ءِ توننگ کن سنبرنگوک اُن‘ دا بیان ایران نا ہمو بیان آن پد مونی بسنے ہراٹی پاننگاسس کہ اگہ واشنگٹن ایران نا برخلاف کارروائی نا ردوریسہ پین مرغن کرے تو یورپ اٹی ساڑی امریکی اڈہ غاتے شست کننگ آ سجفنگ انگ ءِ‘ نیٹو سیوت نا اسہ عہدیدار اس پارے کہ دا سال انا بنا ٹی سیوت نا فضائی دفاعی نظام تینا لائخی ءِ ہمو وخت آ پک کریسس ہراتم ایران آن ترکیہ کن بروک آ میزائل آتے کسر اٹی بھس کننگا۔ نیٹو نا عہدیدار پارے کہ دا وخت آ چندی علاقہ غاتے ٹی میزائل آتے سرسہبی اٹ توننگانے، ہراڑان پاش مریک کہ ننا دفاعی پوزیشن و لائخی سوگو و بھرمی ءِ۔ نیٹو عہدیدار نا رِداٹ نیٹو ہر وڑانا خلیس تون مون تننگ کن سبنرینگوک ءِ و نیٹو نا کل باسک ملک آتا رکھ اکن ہرا المی مس اودے کننگک۔ دا بیان فنانشل ٹائمز نا ہمو رپورٹ آن پد مون آ بسنے ہراٹی امریکہ نا کنڈ آن ایران نا برخلاف پین عسکری کارروائی آ ایران نا گمانی ردِ عمل نا جاچ ہلنگاسس رپورٹ اٹی دانا ورندی ٹی ایران نا کنڈ آن یورپ اٹی ساڑی امریکی اڈہ غاتے شست کننگ نا ذکر ہم ئس، یورپ اٹی امریکہ نا عسکری اڈہ غاک ساڑی ءُ ہراڑے اونا کارندہ غاک ہم اریر و دا وڑا نا ہند آتے ٹی نیٹو نا کیہی باسک ملک آک ہم اوار ءُ۔ امریکہ تون جنگ بنا مننگ آن پد ایران کیہی خلیجی ملک آتیا میزائل و ڈرون جلہو کرینے وخت اس کہ داسہ دا رپورٹ ہم مون آ بسنے کہ اونا کنڈ آن یورپی ملک آتیٹی جوڑ امریکی عسکری اڈہ غاتے گمانی وڑاٹ شست کننگ نا کوشست مننگ کیک۔