پیشن ملک دروک آ ایجنٹ آک بشخنگ کڑزپسہ، چوہدری نعیم کریم

کوئٹہ: مسلم لیگ (ن) نا مرکزی سینئر راہشون چوہدری نعیم کریم یونان کشتی شکست اٹی قیمتی جان تا زیان است ہسونی و ڈکھیائی نا درشانی ءِ کرسا پارینے کہ یونان کشتی شکست بھاز ارمانی ءُ ہیت اسے، ہراٹی آزاد کشمیر ضلع کوٹلی، کھوئی رٹہ و پنجاب نا چندی علاقہ غاتیان تعلق تخوک آ ورناک زوال مسر۔ داڑے جاری مروک اسہ بیان اسے ٹی چوہدری نعیم کریم پارے کہ یونان کشتی شکست آن پد وزیراعظم پاکستان میاں محمد شہباز شریف و بنجائی وزیر داخلہ رانا ثناء اللہ انسانی اسمگلنگ و ورناتے روشنا ءُ تغ نشان ترسا غیرکانودی وڑاٹ پیشن نا ملک گدریفوک آتا برخلاف بے پرخ کریک ڈاؤن نا پرمان کرینو و داتم اسکان مخلوق ءِ غیرکانودی وڑاٹ پیشن نا ملک آ گدریفوک آ کیہی ایجنٹ آتے دزگیر کننگانے۔ اوپارے کہ مسلم لیگ (ن) یونان کشتی شکست اٹ زوال مروک آ بندغ آتا خاہوت آتا غم اٹی بریبر نا شریک اُن ہرانا شاہدی تدوک آ دے وزیراعظم پاکستان مچ آملک اٹی ماتن نادے ءِ اڈترسا تسنے کشتی شکست اٹی زوال مروک آتا ماتن اٹ پاکستان نا بیرک سرنگوں ئس۔ چوہدری نعیم کریم پارے کہ ورناتیان نوکری و نکلی ویزہ غاتا پن آ لکھ آ روپئی ہلسا غیرکانودی وڑاٹ پیشن نا ملک آ گدریفوک آ ایجنٹ ہچ ءُ رعایت اسے نا حقدار افس، اوفتا برخلاف کانود نا رداٹ سخت آن سخت کارروائی کننگے۔ اویونان کشتی شکست اٹ زولا کروک آ پاکستانی تا خاہوت آتون ہڑزخواہی کرسا دعاکرے کہ اللہ تعالیٰ ایماندار تے جنت اٹ جاگہ ایتے و پدسلوک آتے صبر وجمیل عطاکے۔ آمین

(اے پی پی)