عمران خان 9 مئی آ پاکستان نا وجود آ جلہو کرے، خواجہ آصف

سیالکوٹ: وزیر دفاع خواجہ آصف پارینے کہ 9 مئی آ پاکستان نا وجود آ جلہو کننگا، اسہ بندغ اس تینا اقتدوار کن جی ایچ کیو آ جلہو کرے، جی ایچ کیو آ جلہو ہندوستان نا مسخت آتیان ءِ، جلہو کروک آتتون ہمون کننگک دن کہ پاکستان نا دشمن آتتون کننگک، جیب آن جعلی چٹھی کشسا نشان تننگا، پاننگا کہ پیشن نا سازش اسے، ہرانگ ہنار سازش آک؟ ہرافتے امریکہ ٹی کس درست کپک عمران خان ہموفتا نت تیا تمنگ ءِ۔ افواج پاکستان تون یکجہتی نا درشانی کن وزیرِ دفاع خواجہ آصف نا کماشی ٹی یک شنبے نا دے سیالکوٹ اٹی ریلی اس کشنگا۔ وزیرِ دفاع خواجہ محمد آصف ریلی تون اوار چونڈہ ٹی شہداء یادگار آ حاضری تس۔ خواجہ آصف چونڈہ ٹی شہید آتا قبر آتیا پھل شاغا و دعا پاتیا کرے۔ دا وخت آ ریلی آن تران کرسا خواجہ آصف پہارے کہ نن اینو شہید آتا یادگار آ بسنن۔ داڑے بہادری اٹ ہندوستانی فوج ءِ کٹوک آتا یات آک گنڈوک ءُ۔ ہرافک وطن عزیر نا رکھ اکن ندر مسر۔ اوفتے خراج تحسین پیش کیوہ۔ او پارے کہ ساڑی حالیت آتیٹی اسہ سیاسی راہشون و لیڈر اس فوج ءِ ٹارگٹ کننگ اٹی ءِ۔ فوج ءِ ٹارگٹ کننگ نا بابت پیشن نا بندغ آتا ہم دو ارے۔ الس ہرا وڑ فوج اتون مہر کیک، اونا درشانی ءِ دا وڑ اٹ کننگ ءِ۔ خواجہ محمد آصف نا پاننگ ئس کہ ہرا 9 مئی نا واقعہ غاک مسر، اوفتا تاثر ءِ شیف شاغنگ کن وس کننگ انگ ءِ۔ اینو ہم مچ آ فوج تلار آنبار سلوک ءِ۔ فوجی ورناک وطن عزیز کن جان تے ندر کننگ اٹی ءُ۔ افواج پاکستان نا قربانی تا امنائی ٹی یکجہتی نا گرج ءِ۔ بنجائی وزیر پارے کہ قوم ءِ سیوت نا گرج ءِ۔ اقتدار ءِ دا بندغ آک دوارہ تینا دوٹی ہلنگ خوارہ۔ 22 کروڑ الس، شہید آتا اُرا والا تا دا مش اتون مہر جوفہ اسے نا آہری اف۔ نئے جوفہ اسے کن دا گڑاک مریرہ۔ ای اسہ وار ولدا بے کچ قربانی تروک و نشان حیدر دوئی کروک آتے خراج تحسین پیش کیوہ۔ کل بروک آتا منت وار اُٹ کہ اوفک دا یادگار آ تینا قول ءِ پوسکن کننگ کن بسر۔ 9 مئی آ پاکستان نا وجود آ جلہو کننگا، اسہ بندغ اس بیرہ اقتدار کن دا جلہو ءِ کرفے۔ خواجہ آصف پارے کہ کس انا حب الوطنی آ شک کپرہ، ولے 9 مئی آ آرمی تنصیب آتیا جلہو کروک آتا نیت و اوفتا دا مش اتون رشتہ غا سوج ودی مننگ ءِ۔ او پارے کہ سیاستدان تے کن اقتدار ہنوک بروک ءُ گڑا اسے، ولے نن وخت اس ہم فوج اتون تینا رشتہ غا سوج چست کرفتنن۔ خواجہ آصف نا پاننگ ئس کہ عمران خان دروغ تڑنگ نا ماسٹر اسے، ولے داسہ اونا دروغ چلینگ کپسہ۔

(آن لائن)