عمران خان دشمن شاد ءُ کاریم کرے، پروفیسر احسن اقبال
پی ٹی آئی سروک اسٹیبلشمنٹ نا خمب اکن ہروک ءِ کہ اوفک اودے پدی اتیر، بنجائی وزیر ڈٹ بندی
نارووال : بنجائی وزر ڈٹ بندی و شونداری احسن اقبال پارے کہ عمران خان خواہک کہ اسٹیبلشمنٹ اودے دوارہ خمب اٹ تولفسا اقتدار اٹی اتے، فوج انا کنڈ آن مخ تفی کپننگ آ فوج انا برخلاف دوبہ خلنگ بنا کرے۔ ہرا کاریم تے عمران خان کرے اوفتے دشمن کروڑ آ ارب آ روپئی تے خڑچ کرسا ہم کننگ کتوکہ۔ نارووال اٹی میڈیا تون ہیت و گپ کرسا احسن اقبال نا پاننگ ئس کہ عمران خان نا گام گیج آتیان ملک دشمن آک خوش مسر۔ او دشمن شاد ءُ کاریم کارے۔ عمران خان سازش و ڈٹ بندی اٹ 9مئی نا واقعہ غاتے کرفے، ڈٹ ڈَول سجفسا فوجی تنصیب، میٹرو اسٹیشن، و ریڈیو پاکستان پشاور نا ماڑی ءِ ہشار۔ جاست پاست نا کمک اٹ زموار آتے درست کننگ انگ ءِ، اوکان پد شرپسند آتے سخت آن سخت ءُ سزا ترفنگک۔ عمران نیاز ی خواہک کہ اودے دوارہ کمک کرسا اقتدار اٹ اتنگے۔ پاکستان اٹ اولیوک وار وزیراعظم اسے بے پتی نا کمک اٹ اینک کننگا۔ عمران خان تینا با تننگ ءِ امنا کننگ نا جاگہ غا امریکی سازش نا چم ءِ کرے۔ دا بندغ کانود و آئین آن چَپ وڑ تیٹ اسمبلی تے پرغا۔ او پارے کہ عمران خان خواہک کہ اسٹیبلشمنٹ اودے دوارہ خمب اٹ ہرفسا اقتدار اٹ اتے۔ بنجائی وزیر ڈٹ بندی احسن اقبال پارے کہ عمران خان نا وڑ سیاست ءِ پاکستان اٹ امنا کننگپک، ولے پاکستان نا دشمن آک تو بھاز خوش مسنو۔ انتئے کہ اوفک تکرہ کہ عمران خان نا دا سیاست پاکستان ءِ نزور کننگ نا سوب مریک۔ ہندا زار آن پر انگا سیاست نا پد دا مس کہ 9 مئی نا واقعہ غاک مسر۔ 9 مئی آ عمران خان سجفسا ہمو کل ہدف آتے گچین کرے ہرادے ملک دشمن آک کیرہ۔ عمران خان نا 9 مئی آ ہرا ردعمل بس او بیرہ گنوکی اس اف، بلکن ملک دشمنی اسے۔ دا سجفوک ءُ کاریم اس ئس۔ اونا پاننگ ئس کہ ہرا بندغ آک دا کاریم تے کیرہ، اوفک ’نامعلوم‘ اَلوسہ، انتئے کہ کل ءِ سما ءِ کہ اوفک پی ٹی آئی نا عہدیدار ئسرہ۔
(آن لائن)