حکومت الس ءِ سلہہ بند آتا دُو تیا اِلانے،سراج الحق

کوئٹہ ” امیر جماعت اسلامی سراج الحق پارینے کہ حکومت الس ءِ سلہہ بند آتا دُو تیا اِلانے، حکومت الس نا جان و مال انا رکھ انا بابت اسُل بے سہب مسنے۔ دا حالیت و واقعہ غاتا زموار آک دیر ءُ؟ کوئٹہ ٹی پریس کانفرنس کرسا سراج الحق پارے کہ بلوچستان نا حق آتے کن توار چست کرسا کانہ۔ بلوچستان نا آخبت روشنا ءِ۔ 19 مئی نا دے ژوب اٹی جلسہ ئس، کسر اٹی ورنا و بزرگ آک پبی بیا بخیر کریر۔ دا وخت آ ننے آ خود کش جلہو مس۔ اللہ نا لکھ شکر ءِ کہ خودکش ڈٹ بے سہب مس۔ امیر جماعت اسلامی پارے کہ بلوچستان نا مخلوق ءِ کنوئی دیر اکن سکنگ اٹی ءِ۔ داڑے بے ایمنی بے کچ ءِ۔ بیروزگاری ءِ۔ مولانا ہدایت الرحمٰن گوادر نا الس نا حق آتے کن دھرنا تس، ننا داسہ ہم عزم ارے کہ بلوچستان ءِ تنیا الیپنہ۔ پاکستان نا کل آن بھلا و ہستی تیان شُپ صوبہ باردو نا دُپ اس جوڑ مسنے۔ سراج الحق نا پاننگ ئس کہ بلوچستان نا ویل آتیان صوبائی و بنجائی حکومت آک خن تے تر کرینو۔ صوبہ ٹی موٹروے نا اسہ کلو میٹر سڑک اس ہم جوڑ اف۔ دہ سال آن بلوچستان اٹی سڑک، سی پیک و شونہالی نا نعرہ غاتے بننگ اُن۔ بلوچستان اٹی دن ءُ ہچ ءُ گڑاس خننگپک۔ بلکن داڑے بے ایمنی و ٹارگٹ کلنگ ءِ۔ او دا ہم پارے کہ جماعت اسلامی بلوچستان نا حق آتے کن جنگ تننگ نا فیصلہ کرینے، ننا پارلیمنٹ نا باسک آک مدام بلوچستان نا حق آتے کن توار چست کرینو۔

(آن لائن)