اسپیکر آئین نا خلاف ورزی ءِ کرے، آرٹیکل 6 خلنگے، اپوزیشن سیوت

اسلام آباد(آن لائن) اپوزیشن سیوت پارینے کہ اسپیکرقومی اسمبلی بے پتی نا تحریک پیش مننگ آن پد 14 دے ٹی دیوان بٹنگپننگ آ آئین نا خلاف ورزی ءِ کرینے، اسپیکر نا برخلاف آرٹیکل شش خلنگے، اسپیکر ءِ انت ویل اس ہرفیسس کہ دیوان ءِ وخت آ بٹنگتو؟ 21 نا جاگہ غا 25 مارچ آ دیوان بٹنگ انگ آئین آن چَپ ءِ۔ اومیت ءِ اٹارنی جنرل عدالت اٹی انت کہ پارے اوڑا سلک۔ او آئی سی کن لانگ مارچ ءِ پد بٹین، او آئی سی کانفرنس اٹی بروک آک ننا ایلم ءُ، حکومت بے پتی آن نرنگ اٹی ءِ۔ سندھ ہاؤس آ جلہو بنجا غا جلہو ءِ۔ دا ہیت آتا درانی ءِ اپوزیشن راہشون شہباز شریف و چیئرمین پاکستان پیپلز پارٹی بلاول بھٹو زرداری ایلو اپوزیشن راہشون و وکیل آتتون اوار دوشنبے نا دے سپریم کورٹ نا پیشن آ میڈیا تون ہیت و گپ کرسا کرے۔ شہباز شریف پارے کہ اسپیکر بے پتی نا تحریک نا پیش مننگ آن پد 14 دے ٹی دیوان بٹنگتو، تو آئین آن نمن مس۔ اسپیکر کانود آن ہرا وڑ نمن مسنے او داسہ عدالت اٹی سماعت مننگ ءِ، و داڑا فیصلہ ءِ داسہ عدالت کیک۔ شہباز شریف نا پاننگ ئس کہ اسپیکر قومی اسمبلی آئین نا خلاف ورزی ءِ کرینے، اسپیکر قومی اسمبلی او آئی سی دیوان آن مست قومی اسمبلی نا سیشن ءِ انتئے بٹنگتو؟ اسپیکر رزاک آ چانڑدہ دے ٹی دیوان بٹنگتو، و آئین نا خلاف ورزی ءِ کرے۔ اپوزیشن ءِ ٹریپ کننگ کن اسپیکر دیوان ءِ بٹنگتو۔ شہباز شریف پارے کہ نن او آئی سی دیوان نا سوب آن تینا لانگ مارچ ءِ پد بٹین۔ او آئی سی دیوان اٹی بشخ ہلنگ کن بروک آ راہشون ننا مہمان ءُ۔ ننا ایلم ءُ۔ نن است انا ہُب اٹ اوفتے بخیر کینہ۔ دا رداٹ حکومت نا کنڈ آن مروک پروپیگنڈا سٹی ءِ۔ دا وخت آ میڈیا تون ہیت و گپ کرسا چیئرمین پاکستان پیپلزپارٹی بلاول بھٹو زرداری نا پاننگ ئس کہ باسک آتے وونٹ بٹنگ آن کس توننگ کپک۔ حکومت ہنداخس خلیسنے کہ او بے پتی تحریک آن نرنگ کن آئین ءِ پرغنگ اسکان ہم گام ہرفنگ ءِ۔ حکومت اسپیکر قومی اسمبلی نا کمک اٹ آئین نا خلاف ورزی ءِ کرے۔ صدر سپریم کورٹ بار احسن بھون پارے کہ جمہوری اسپیکر ءِ آئین نا رند ءِ دروئی تمک۔ عملدرآمد مفننگ آ آرٹیکل 6 نا رد اٹ کارروائی مریک۔ تاریخ اٹی اینو اسکان اسہ دیوان اس ہم پاننگ کپنہ ہراٹی رول 37 نا کال آ خلاف ورزی کننگانے۔ نن وکیل نا وڑ پاننگ کینہ کہ ملکی نظام جمہوری عمل نا رد اٹ چلیفنگے۔ داکان مست سپریم کورٹ نا پیشن میڈیا تون ہیت و گپ کرسا پی ڈی ایم سروک مولانا فضل الرحمٰن پارے کہ حکومت ہر بشخ اٹی بے سہب مسنے، دا حکومت اٹی ملک اٹ جمہوریت اف، اسہ آمرانہ وڑ انا حکومت اسے، آمرانہ ءُ سوچ اسے، دا حکومت دز درگہ غان اقتدار اٹی بسنے، و چندی بہانہ غاتیٹ تینا اقتدار ءِ مرغن کننگ نا کوشست کننگ اٹی ءِ، فضل الرحمن نا پاننگ ئس کہ نن 25 مارچ آ تینا لانگ مارچ ءِ شاہراہ دستور آ دینہ، وخت اس کہ نن داکان مست پر امن آزادی مارچ ہم کرین، ہندا سوب آن ننا تاریخ شاہد ءِ کہ پرغ بٹ، و بیداد آ باور کروک آتیان افس۔