جرمنی و پاکستان نا نیام اٹ تعلقداریک سوگو ءُ، میر قدوس بزنجو

کوئٹہ: وزیر اعلیٰ ٰبلوچستان میر عبدالقدوس بزنجو پارینے کہ جرمنی و پاکستان نا نیام اٹ تعلقداریک سوگو ءُ، دا ہیت آتے او تدوک آ دے جرمنی نا سفیر مسٹر ایلفرڈ گریناس تون اوڑدہی نا وخت آ گپ و تران کرسا کرے۔ اوڑدہی ٹی سرمایہ کاری نا شون تننگ تون اوار تین پہ تینی است خواہی نا چندی باندات آتیا ہیت و گپ کننگا۔ وزیر اعلیٰ جرمن سفیر ءِ ریکوڈک ڈٹ و گوادر پورٹ و بلوچستان اٹی چندی بشخ آتیٹی سرمایہ کاری نا وارخواہی تا بابت بریفنگ تس۔ او پارے کہ بلوچستان اٹی جغرافیائی دنگ و سیم، کرّکی پٹی، توانائی نا بدل گیگ وڑ، و نہادی معدنیات نا بابت ہزگار ءِ۔ او پارے کہ بلوچستان اٹی سرمایہ کاری نا بھلو وارخواہی ارے، ریکوڈک ڈٹ دانا گچین انگا درور ءِ۔او پارے کہ بلوچستان اٹی سرمایہ کاری کن رکھوک و سازگار چاگڑد فراوان کننگ انگ ءِ۔ سفارتی دورہ غاتیان بلوچستان نا بارو اٹ دنیا ءِ معلومداری رسینگک۔ او پارے کہ حکومت پیشن نا سرمایہ کاری نا شون تننگ کن سرمایہ کار آتے آسراتی فراوان کننگ انگ ءِ۔ دا رد اٹ بلوچستان بورڈ آف انویسٹمنٹ اینڈ ٹریڈ و پبلک پرائیویٹ پارٹنر شپ اتھارٹی نا ادارہ غاک گچین کارکرد نشان تننگ اٹی ءُ۔دا وخت آ جرمن سفیر بلوچستان اٹی سرمایہ کاری نا وارخواہی تیٹی است خواہی درشان کرے۔ او پارے کہ جرمن سرمایہ کار آتے بلوچستان اٹی سرمایہ کاری نا کنڈ آ بننگ کن پاننگک۔جرمنی نا حکومت بلوچستان اٹی کسبکار بندغ جوڑ کننگ و جانجوڑی تون اوار ایول بشخ آتیٹی کمک کیک۔او پارے کہ بلوچستان تون واپار نا بابت حالی حوالی نا چر ءِ برجا تخنگک۔او پارے کہ بلوچستان توانائی نا بدل گیگ وڑ تے کن بھاز گچین ءِ۔نن توانائی و دیر انا بشخ آتیٹی کمک ءِ شون ایتنہ۔ جرمنی پاکستان کن شونداری پروگرام تیٹی بلوچستان ءِ ہم اولیت ایتک۔ اوڑدہی نا وخت آ موسمیاتی بدلی نا زہم و اوفتا توننگ نا بابت ہم ہیت و گپ مس۔وزیر اعلیٰ موسمیاتی بدلی نا سوب آن نوکاپ و اوڑان بلوچستان ءِ مروک نسخان تا بابت حوال تس۔ و پارے کہ حکومت داسکان نوکاپ نا بھسکاری تے چٹفنگ کتنے، اومیت ءِ کہ جہانی برادری کمک و بحالی کن مونی بریک، و پڑو آتیا عمل کننگک۔دا وخت آ جرمن سفیر نوکاپ آن مروک نسخان تیا است ہسونی نا درشانی کرے۔

(تلار حوالکار)