پاکستان روس آن خام تیل، پیٹرول و ڈیزل در آمد کیک

اسلام آباد: پاکستان روس آن خام تیل، پیٹرول و ڈیزل درآمد کننگ نا فیصلہ کرینے، وخت اس کہ ہڑتوم آ ملک آتا نیام اٹ چندی بشخ آتیٹی تین پہ تینی کمکاری ءِ ودفنگ آ امنا کننگانے، تیل و گیس انا بشخ آتیٹی واپار نا معاہدہ ءِ مارچ 2023ء اسکان پک کننگک۔ پاکستان روسی سرمایہ کار آتے شریداری نا رد اٹ سرمایہ کاری نا سلہ خلک۔ پاکستان و روس انا نیام اٹ واپار، اقتصادی، سائنسی و تکنیکی کمکاری نا 8می دیوان نا اسیجائی اعلامیہ جاری۔ بین الحکومتی کمیشن واپار، اقتصادی، سائنسی و تکنیکی کمکاری نا دیوان مسہ دے اسکان برجا سلیس۔ روسی ڈَل انا کماشی ءِ وزیر توانائی نکولے شولگینوف و پاکستانی ڈَل انا کماشی ءِ سردار ایاز صادق کرے۔ اعلامیہ نا رداٹ ہڑتوم آ فریق آک ہفتمی آئی جی سی نا ہیت و گپ و فیصلہ غاتے مونی دریر۔ ہڑتوم آ ملک آک چندی بشخ آتیٹی کمکاری ءِ ودفنگ آ امنا کرینو۔ تیل و گیس انا بشخ اٹی واپار نا معاہدہ ءِ مارچ 2023ء اٹی پک کننگک۔ ہڑتوم آ ملک آتا نیام اٹ واپار کن ہل/ و تس نا ہندن ءُ پنجر اس جوڑ کننگک کہ ہڑتوم آ ملک آتے فائدہ مرے۔ اعلامیہ ٹی پاننگانے کہ ہڑتوم آ کنڈ آک توانائی نا بشخ اٹی کمکاری کن جامع ڈٹ ڈَول اسے آ کاریم کننگ آ ہم امنا کرینو۔ جامع ڈٹ بندی آخبت نا کاریم تا بنداو آ کننگک، و اودے 2023ء اٹی پک دروشم کننگک۔ ہڑتوم آ ملک آتا نیام اٹ پاکستان اسٹریم گیس پائپ لائن پراجیکٹ آ جامع انفراسٹرکچر نا بابت ہم سجفنگا، و بارڈر نظام نا ر داٹ واپار آ ہم ہیت و گپ مس۔ اعلامیہ نا رد اٹ پاکستان روسی سرمایہ کار آتے شریداری نا ر داٹ سرمایہ کاری نا سلہ خلک۔ مئی 2023ء اٹی پاکستان اٹی روسی سرمایہ کاری نا پروٹوکول ءِ پک دروشم تننگک۔ ہڑتوم آ کنڈ آتیان ریل و سڑک نا بنداوی پنجر نا شونداری و گچینی کن معلومداری نا ہل/ تس آ ہم امنا کننگا۔ اعلامیہ نا رداٹ پاکستان و روس انا نیام اٹ کسٹم نا بابت ڈیٹا شیئرنگ تون اوار 3 معاہدہ غا دستخط ہم کننگانے۔ معاہدہ نا رد اٹ پاکستان و روس نا نیام اٹی کسٹم باندات آ کمکاری مریک۔ روسی فیڈریشن و اسلامی جمہوریہ پاکستان نا حکومت آتا نیام اٹ درمیان کسٹم باندات آتیٹی کمکاری و تین پہ تینی کمک نا بابت معاہدہ غا دستخط کننگانے، وخت اس کہ روس پاکستان نا نیام اٹ دننگ اتنگ نا گڑا تا کسٹمز ویلیو آ دستاویز و ڈیٹا نا ہل/ تس نا پروٹوکول نا معاہدہ غا ہم دستخط کننگانے۔ ایروناٹیکل گڑا تا فضائی بود آ کاریم کننگ نا ہم معاہدہ مسنے، وزیر اقتصادی باندات ڈویژن سرادر ایاز صادق پارے کہ پاکستان و روس انا نیام اٹ معاہدہ غاتیان زرگزرانی فائدہ دوئی مریک۔ پاکستان و روس انا نیام اٹ گیس پائپ لائن ڈٹ آ ہم سجفنگا۔ ایازصادق پارے کہ توانائی نا بشخ اٹی کمکاری آ پیدوار پیشرفت مسنے۔ توانائی، کشت و کشار، مالیات، واپار، سرمایہ کاری و کسٹم نا بشخ آتیٹی کمکاری آ امنا مسنے۔

(آن لائن)