یو ایس ایڈ نا بلوچستان اٹی کاریمک ستا کڑزرہ، چیئرمین سینیٹ

اسلام آباد: چیئرمین سینیٹ صادق سنجرانی پاکستان، امریکہ تین پہ تینی واپار و اقتصادی تعلقداری تے سوگو کننگ آ زور شاغسا پارینے کہ یوایس ایڈ تون اواری اٹ بلوچستان نا مر انگا علاقہ غاتیٹی کمیونٹی ڈیویلپمنٹ نا کاریم ستا کڑزک۔ دا بابت پین کاریم نا گرج ءِ۔ سرجم حوال آتا رد اٹ امریکی سفیر ڈونلڈ بلوم اسلام آباد اٹی چیئرمین سینیٹ نا اُرا غا ہنا، اوڑے او چیئرمین سینیٹ محمد صادق سنجرانی تون اوڑدہی کرے۔ اوڑدہی ٹی تین پہ تینی است خواہی نا باندات آتیا ہیت و گپ کننگا۔ چیئرمین سینیٹ چندی بشخ آتیٹی پاکستان تون کمکاری و اسیجائی کاریم تیا امریکی حکومت نا منت ءِ ہرفے۔ چیئرمین سینیٹ نوکاپ زہمی تا کمک آ ہم امریکی حکومت نا منت ءِ ہرفے۔ اوڑدہی ٹی تین پہ تینی تعلقداری تا شون تننگ آ ہیت و گپ تون اوار واپار نا بابت حالی حوالی کننگ اٹ ودکی آ زور شاغنگا۔ چیئرمین سینیٹ صادق سنجرانی پارے پاکستان و امریکہ نا نیام اٹ ودیک وڑ انا تعلقداریک کیہی دہائی تیا تالان ءُ۔ چیئرمین سینیٹ بلوچستان اٹی نوکاپ نا وخت آ یو ایس ایڈ نا نوکاپ زہمی تے کن کمک ءِ ستا کرسا پارے کہ یو ایس ایڈ تون اواری اٹ بلوچستان نا مُر انگا علاقہ غاتیٹی کمیونٹی ڈیویلپمنٹ نا کاریمک ستا کڑزرہ۔ دا بابت پین کاریم نا ہم گرج ارے۔

(آن لائن)