چار سال تراپوڑی تیان گچین کاری نا شئیر خلنگ ءُ، مریم اورنگزیب

اسلام آباد : بنجائی حوالکاری وزیر مریم اورنگزیب پارینے کہ سیوتی حکومت نا کل آن بھلا سرسہبی ملک ءِ پراجیکٹ عمران آن پاک کننگ ئس۔ ملک ءِ کل آن بھلا فارن ایجنٹ فتنہ و مافیا غان خلاسی ترفین۔ مدام ملک و زرگزران ءِ خواری تیان کشسا ہنانن۔ عمران خان نا بیان آ رد عمل ترسا مریم اورنگزیب پارے کہ دا بندغ چار سال تراپوڑی تیان گچین کاری نا شئیر خلنگ ءِ۔ او پارے کہ عمران پراجیکٹ ملک ءِ زرگزرانی وڑ اٹ دیوالیہ کرے۔ اینو ملک ءِ کبینی، زرگزرانی بھسکاری و سیاسی شیفی عمران پراجیکٹ نا سوب آن پلویڑ کرینے۔ پاکستان مسلم لیگ (ن) 2018ء اٹی ملک ءِ تاریخی زرگزرانی سوگوی و الس ءِ اڑزان اِرغ، بورہ، نُت، بجلی، گیس و پٹرول ترسا ہناسس۔ پاکستان مسلم لیگ (ن) 2018ء اٹی ورنا تے روزگار، ملک ءِ شونداری، سی پیک و 14000 میگاواٹ بجلی تننگ آن پد ہناسس۔ دہشت گردی آن پاکستان اس تسوسن۔ ملک ءِ تاریخی 6.2 درسد شونداری و آئی ایم ایف نا پروگرام ءِ پورو کرسا تننگاسس۔دافک بسر و چار سال اٹ کل گڑا تے خراب کریر۔

(آن لائن)