براہوئی ادبی حوال

٭براہوئی کتاب آتا چھپائی 

٭ گورنر بلوچستان تون ملاقات

٭ براہوئی نا ترجمہ کروک آ قرآن مجید ولدا شینک مس

ہراتم آن کہ حکومت نا پارہ غان کتاب آتے ایوارڈ تننگ نا بِنا مسنے، ایڑان پد نئے بیرہ پنی آ ادیب و شاعر آک بلکن پوسکن آ نوشتکار آتا دا اُست خواہی ءِ کہ اوفتا کتاب آک شینک مریر۔ دا سوب آن اوفک ننے آ بریرہ خواست کیرہ کہ نم ننا کتاب آتے شینک کبو۔ حالانکہ ننا فنڈ کم ءِ۔ بیرہ دہ لکھ روپئی براہوئی ادبی سوسائٹی ءِ رسینگک۔ دا دہ لکھ اٹی پنچ لکھ دفتر نا کرا، کمپوزر، دفتر اٹی کاریم کروک آتا تنخواہ و ایلو خڑچ آک ءُ، دافتے ٹی ادبی کچاری، مشاعرہ و نشست آک ہم اوار ءُ۔ بیرہ پنچ لکھ روپئی بچرہ کہ اوفتیان نن ہشت دہ کتاب شینک کینہ۔ دا وخت آ ہم براہوئی ادبی سوسائٹی تون بیست اسے نا کچ کتاب تخوک ءُ ہرافتے شینک کننگ کن پیسہ درکار ءِ۔

خدو نا سال گورنر محمد خان اچکزئی ننے دہ لکھ روپئی تننگ نا پڑو کرے۔ یونس بلوچ ڈپٹی میئر لکھ روپئی و ایم پی اے ڈاکٹر شمع اسحاق لکھ روپئی تننگ نا پڑو کرے۔ ولے دا بیرہ پڑو اسکان سلیسُر۔ پیسہ غاک داسکان رسینگتنو انتئے کہ ہراتم کہ اوفک کرسی نا خواجہ و گودی ئسر تو ہندا پاریرہ کہ داسہ ایسہ فنڈ بریک و نن نمے پیسہ ایتنہ و نم کتاب شینک کبو۔ ولے ہراتم کرسی اوفتا دو آن ہنا داسہ پارہ کہ نن غریب مسن۔ داسہ نن تون تینٹ پیسہ اف۔ نم کن ہراکان اتین۔ اگہ دا پیسہ غاک ننے رسینگارہ تو باور کیرے کہ نن چِل پنجا کتاب شینک کرینہ۔

نن تینا شاعر و ادیب آتا کتاب آتا شینک کننگ نا اُست خواہی ءِ مون آ تخسا ای بحیثیت چیئرمین براہوئی ادبی سوسائٹی و نور خان محمد حسنی جنرل سیکرٹری نا حیثیت اٹ داسہ نا گورنر جسٹس (ر) امان اللہ خان یاسین زئی تون ملان، و اوڑان خواست کرین کہ مون نا گورنر ننے دہ لکھ روپئی تننگ نا قول و قرار کریسس۔ نم انت پارے؟ او پارے کہ کن تون تو فنڈ اف۔ ای کوشست کروٹ و وزیراعلیٰ ءِ پاروٹ، نوا او نم کن گڑا نہ گڑاس کے۔ دا وخت آ نن براہوئی ادبی سوسائٹی نا شینک مروک آ کتاب آتے اوفتے ٹیکی تسن، و ڈاکٹر عبدالرحمن براہوئی نا کتاب ”بلوچستان میں دینی ادب“ ءِ ہم تسن۔ داڑتون اوار ڈاکٹر صاحب نا بارو اٹ سرجم اٹ اودے پارین۔ او پارے کہ ڈاکٹر عبدالرحمن براہوئی اسہ بھلو بندغ اسے۔ او ننا سنگت مسنے۔ و ننا ہائی کورٹ اٹ رجسٹرار ہم رہینگانے۔ نن اودے پارین کہ ڈاکٹر صاحب نا طب ہم جوان اف۔ باید ءِ کہ اونا درمان مرے۔ اخیر اٹ او ڈاکٹر عبدالرحمن براہوئی نا شخصیت نا چندی پلو آتیا ہیت کرے۔ یات سلے کہ دا مچ آ ہیت و گپ براہوئی زبان اٹی مس۔ و نن اونا براہوئی چاہنگ آن متاثر مسن۔ او پارے کہ فنڈ آتا کمبوتی آن پد ہم براہوئی ادبی سوسائٹی یک و نیم سد آن زیات کتاب شینک کرینے کہ دا سفت کڑزک۔ او پارے کہ بلوچستان تینا تہذیبی، ربیدگی میرات و آثار قدیمہ نا رد اٹ اسہ جتاءُ حیثیت اس تخک، باید ءِ کہ بلوچستان تون است خواہی تخوک آ اسکالر آتے نن دا بارواٹ معلومداری ایتن۔ و بلوچستان ءِ دنیا ٹی درستی راستی کرفن۔ گورنر بلوچستان براہوئی ادبی سوسائٹی نا ڈَل ءِ ہر وڑ انا کمک نا باور کرفے۔

براہوئی ادبی سوسائٹی نا دا خواہنداری ءِ کہ وزیراعلیٰ و ایلو منصبدار آتتون ملاقات کرسا اوفتا چکار ءِ براہوئی ادب نا ویل آتا پارہ غا کرفے۔ انتئے کہ بیدس حکومت نا کمکاری آن ادب و زبان کن کروک آ کاریمک مون مستی شون ہلنگ کپسہ۔ گورنر بلوچستان نا براہوئی زبان تون است خواہی ءِ مون آ تخسا دا اومیت کننگ مریک کہ اونا راہشونی اٹ بلوچستان نا حکومت بلوچستانی زبان نا ادارہ غاتتون زیات آن زیات کمک کرو تاکہ دا زبانک ایلو صوبہ غاتا شون ہلوک آ زبان تا بریبر بننگ کیر۔

سندھ آن بروک آ پنی آ شاعر، ادیب مولانا عبدالقیوم جوہرؔ تون اسہ ادبی ءُ کچاری اس اڈ تننگا۔ دا کچاری ٹی علامہ محمد عمر دین پُوری نا نوشتہ کروک آ قرآن مجید کہ اودے قطر اٹ تُولوک آ براہوئی عالم دین مولانا عبدالقادر محمد شہی اول سر جاچ آن پد اسہ وار ولدا شینک کرفے۔ دا ادبی کچاری ٹی دا قرآن مجید نا مون پاشی مس۔ دا قرآن مجید نا کمپوزنگ و کمکاری ءِ خضدار نا ورنا علی اکبر زہری کرے۔ علی اکبر زہری ہم قطر اٹی کاریم کیک۔ او براہوئی زبا ن نا سافٹ ویئر کی بورڈ ءِ ہم جوڑ کرینے، ہراڑان براہوئی زبان نا کمپوزنگ اٹ آسانی مسنے۔ و اسہ ایپ اس جوڑ کرینے، ہرا موبائل اٹ براہوئی لکھنگ کن کاریم بریک۔ دا ہم پوسکن آ دور اتون تینا زبان ءِ ہم گرنچ کننگ کن ستا کڑزوک ءُ کاریم اسے۔

براہوئی اکیڈمی خضدار شاخ انا دا ادبی کچاری ٹی پنی آ ادیب، شاعر و فنکار آک بشخ ہلکر و مولانا عبدالقیوم جوہرؔ تون اسہ شام اس اڈ تننگا، ہراٹی مشاعرہ اس ہم مس۔

ہفتئی تلار

تاک: 34

05-11 September 2020

پنہ:4