رلی روسو پاکستانی مہمان نوازی نا شیدائی مس

0

Get real time updates directly on you device, subscribe now.

بلوم فونٹین (مانیٹرنگ ڈیسک) ملتان سلطانز نا سویلی افریقی کرکٹر رلی روسو پاکستانی مہمان نوازی نا شیدائی مس، اُلس نا مہر ءِ خننگ آن پد 2017 ٹی پاکستان آ بننگ نا فیصلہ پشیمان خننگاکہ۔ سویلی افریقی بیٹسمین رلی روسو کوئٹہ گلیڈی ایٹرز نا ہمو در ملکی گوازی گرتیٹی ساڑی ئس ہرافک 2017 ٹی لاہور اٹ پی ایس ایل نا فائنل ءِ گوازی کننگ آن نمن مسوسُس، پد آن نہ بیرہ پاکستان آ بس وخت اس کہ گلیڈی ایٹرز نا چمپئن مننگ نا مہم نا بشخ اس ہم سلیس، دا وار او ملتان سلطانز نا نمائندگی ءِ کرسا ٹیم ءِ گروپ مرحلہ ٹی ٹاپ پوزیشن آ اتنگ اٹ جوان کڑد ادا کرے، ولدا ہم کرونا وائرس نا سوب آن اولیکو مرحلہ ٹی پدی تینا ملک آ ہنوک آتیٹی رلی روسو ہم اوار ئس۔ او ویب سائٹ ”کرک انفو“ ءِ انٹرویو ترسا پارینے کہ بدقسمتی آن ای پی ایس ایل 2020 نا بشخ اس سلنگ کتوٹ، ملتان سلطانز ٹی گوازی کننگ و جوان انگا بندغ آتون گوازی کننگ کنکن اعزاز اسے، جوان مہمانداری و پی ایس ایل 5 ءِ کنکن یات گری اس جوڑ کننگ اٹ پاکستان نا منتوار۔ رلی روسو ءِ داسہ دا ہیت انا افسوز ءِ کہ او 2017 ٹی پاکستان انتئے بتو، او پارینے کہ ہراتم ای پدی ہروہ تو بھاز افسوز مریک کنے، ہمو وخت آن ای ہر سال پاکستان آ برسا مہمانداری نا مزہ ءِ ہلنگ اٹی اُٹ، ای ہر وخت تینے پاکستان اٹ رکھوک تکاٹ، انت اس کہ ای داسہ چاوہ اگہ ہمو وخت آ چاہسٹہ تو مننگ کیک کنا فیصلہ جتا مسکہ۔ رلی روسو خاص کر ملتان اٹ گوازی کننگ آن بھاز مزہ ہلک، او پارینے کہ ملتان کنکن بھاز خاص ءِ، ای اوڑے گدریفوک آ وخت آن بھاز چَس ہلکوٹ، کراچی، لاہور و پنڈی ٹی تو نم کرکٹ تون مابت ءِ خناسرے ولے ہراتم کہ ای ملتان اٹ انت اس خناٹ تو کنے محسوس مس کہ کرکٹ دا ملک اکن اخس اہمیت تخک۔ کنے اومیت ءِ او کنا است خواہی ءِ اگہ کل گڑاک پلان نا وڑاٹ مسر تو پاکستان اٹ کرکٹ پدی بریک۔ تینا مسکوہی ٹیم کوئٹہ گلیڈی ایٹرز نا باروٹ او پارینے کہ او کنا اُست آن بھاز خڑک ءِ، دا وار سفر ننا جوان سلتو، عمر اکمل نا مفننگ آن اوفتے آ بھاز فرق تما، اومیت ءِ کہ بروک آ سیزن اٹ جوان کم بیک کیک۔

Get real time updates directly on you device, subscribe now.

Leave A Reply

Your email address will not be published.