اِرا خاہوت سی سال اٹ پاکستان ہر گڑا ٹی پدی دریر، عمران خان

لاہور: پاکستان تحریک انصاف نا چیئرمین س مسکوہی وزیر اعظم عمران خان پارینے کہ اِرا خاہوت سی سال اٹ پاکستان ہر گڑا ٹی پدی دریر، پاکستان ڈبینگ انگ ءِ، دا ہڑتوم آ خاہوت آتا میرات آک ودفنگ اٹی ءُ، پی ڈی ایم سرکار ءِ کس ہم پیسہ تننگ کن تیار اف۔شہباز شریف بھارت ءِ سفت کیک، ای 26 سال آن رول آف لا کن جہد کننگ اٹی اُٹ، آئی ایم ایف ہمو وخت وام ایتک ہراتم اونا شڑت آک پورو مریر۔ وکیل آک پاکستان ءِ دا مین آن کشنگ کیرہ۔ اسہ بندغ اس سازش کرسا رجیم چینج نا فیصلہ کرے، اسہ بندغ اسے نا فیصلہ نا سوب آن حکومت ءِ بٹیر۔ رول آکر کانفرنس اٹی ویڈیو لنک نا کمک اٹ وکیل آتیان تران کرسا عمران خان پارے کہ پی ڈی ایم سرکار فیل مسنے، اِرا خاہوت نا سوب آن ملک ڈبینگ انگ ءِ۔ کس ہم روپئی اس ہم تننگ کن تیار اف۔ داسہ تو سعودی عرب ہم نمن مسنے۔ آئی ایم ایف ہمو وخت آ وام ایتک کہ اونا شڑت آک پورو مریر۔ پاکستان اٹی سری لنکا آن زیات بد ءُ حالیت اس مننگ خڑک ءِ، حالیت آتا گچینی نا اسٹ انگا کسر شفاف گچین کاری ءِ۔ او پارے کہ ملک انا تاریخ اٹ داخس بھلو کرائسز بتنے، ہراکہ داسہ بسنے۔ پاکستان مین ہنانے، وکیل آک پاکستان ءِ دا مین آن کشنگ کیرہ۔ او پارے کہ دا 8 تُو دنیا ٹی گوہی کننگ ءُ، بلاول زرداری تو ہچ پاکستان اٹی خننگپک ہم، ولے اوفتے کس پیسہ تننگ کن تیار اف۔ کس گمان ہم کننگ کپک کہ اینو ایل سیل آتے ملنگ کن ہم پیسہ اف۔عمران خان پارے کہ کنے آ جلہو نا جاست پاست اٹ دیر اڑاند شاغنگ ءِ؟ جے آئی ٹی ءِ لتاڑ کننگ نا کوشست کننگ انگ ءِ۔ اعظم سواتی آ نواسہ غاتیا مون آ بیداد کننگا، ای تینے آ مروک جلہو نا مقدمہ ہم درج کرفنگ کتوٹ۔ 75 سال نا اعظم سواتی آ ٹویٹ کننگ آ مچ آ ملک اٹ مقدمہ درج کننگا۔ عمران خان پارے کہ 90 نا دہائی ٹی پاکستان نا کل اعشاریہ غاک مثبت ئسر، ولے اینو پاکستان سری لنکا کون ءُ حالیت اسے تون مون تروک ءِ۔ و پاکستان نا زرمبادلہ غاک تاریخ اٹ داخس شیف ہنتنو، ہراخس کہ داسہ ءُ۔ ملک اٹی کانود نا بالادستی المی ءِ، و کانود عملدرآمد مس تو ملک ساڑی حالیت آتیان پیش تمنگ کیک۔

(آن لائن)