بولان، ریلوے ٹریک آ دھماکہ، جعفر ایکسپریس نا 9 بوگی شیف دَڑار

کوئٹہ :بولان نا علاقہ مچھ انا خڑک آ پنیر ریلوے ٹریک آ دھماکہ غان جعفرایکسپریس نا انجن تون اور 9 بوگی پٹڑی آن دڑار، 17 بندغ ٹھپی مسر، سیکورٹی فورس آک واقعہ غان پد علاقہ ءِ گھیڑ کریر، و ریسکیو نا کاریم تے بنا کننگانے۔ سبی و بولان نا ہسپتال آتیٹی ایمر جنسی نافذ کننگا، ٹھپی تے سول ہسپتال و سی ایم ایچ آ گدریفنگانے، ہراڑے 4 مسافر نا وڑ نازرک خننگک۔ سرکاری حوالی تا رد اٹ جعفر ایکسپریس مچھ آن پشاور کن ہناکہ، مچھ انا خڑک آ پنیر و پیشی نا نیام مشی آ علاقہ ٹی جعفر ایکسپریس ءِ شست کننگانے، جعفر ایکسپریس مچھ آن پشاور کن ہناکہ کہ ریلوے ٹریک آ دھماکہ مس، دھماکہ غان انجن تون اوار 9 بوگی پٹڑی آن دڑار۔ ہراڑان 17 مسافر ٹھپی مسر۔ ہرافتیان چار نا وڑ خراب خننگک۔ واقعہ غان پد سول ہسپتال سبی و بولان اٹی ایمر جنسی نافذ کننگانے۔ وزیراعلیٰ بلوچستان میر عبدالقدوس بزنجو، قائمقام گورنر بلوچستان میر جان محمد جمالی و میر ضیاء اللہ لانگو اسک تینا جتا جتا بیان تیٹی جعفر ایکسپریس ءِ دہشت گرد آتا کنڈ آن شست کننگ نا واقعہ نا مذمت ءِ کرسا ٹھپی تتون است ہسونی نا درشانی کرینو۔ وزیراعلیٰ نا کنڈ آن دہشت گردی نا واقعہ نا دمدستی پد ڈپٹی کمشنر کچھی و سبی ءِ ریسکیو سرجز آتا بنا و زہمی مسافر تا ہر وڑ اٹ کمک، ٹھپی تے ہسپتال آتیا دننگ و درمان نا گچین آسراتی فراوان کننگ نا پارت کننگانے۔ وخت اس کہ وزیر اعلیٰ سبی و مچھ انا ہسپتال آتیٹی ایمرجنسی نافذ کنگ نا پارت کرینے۔ وزیراعلیٰ دا ہم پارت کرینے کہ ریلوے ٹریک گیس پائپ لائن و بجلی نا تنصیب آتا رکھ اکن پین گام گیج پک کننگے۔

(آن لائن/ خ ن)