انا میچ آتا شیڈول جاری، کوئٹہ ٹی ہچ ءُ میچ اس مفک PSL-8
اولیکو میچ ملتان اٹی 13 فروری آ ملتان سلطانز و لاہور قلندرز نا نیام اٹ مریک، فائنل 19 مارچ آ لاہور اٹ مریک
لاہور: پاکستان کرکٹ بورڈ (پی سی بی) نا منیجمنٹ کمیٹی نا سروک نجم سیٹھی پاکستان سپر لیگ (پی ایس ایل) نا 8 می ایڈیشن نا شیڈول نا پڑو ءِ کرے۔ لاہور اٹی پریس کانفرنس کرسا نجم سیٹھی نا پاننگ ئس کہ کنے پی ایس ایل 8 نا بابت پریس کانفرنس کننگ آ خوشی مننگ اٹی ءِ۔ تدوک آ سال پی ایس ایل کن جوان ئس۔ پاکستان سپر لیگ آئی پی ایل آن بھلو ٹی ٹوئنٹی برانڈ اسے۔ او پارے کہ پی ایس ایل 8 انا بنائی دود ملتان اٹی مریک، لیگ انا میچ آک اِرا بشخ اٹ مریرہ۔ میچ آک ملتان، کراچی، راولپنڈی و لاہور اٹی مریرہ۔ او پارے کہ پی ایس ایل نا وخت آ ویمن نا مسہ نمائشی میچ مریرہ، ہرافتیٹی درملکی گوازی گرک ہم اوار اریر۔ نجم سیٹھی پارے کہ منیجمنٹ کمیٹی نا اولیکو میٹنگ اٹی پاریٹ کہ کوئٹہ ٹی نمائشی میچ کرفنگ خوانہ، کوئٹہ ٹی میچ آتے کن او جاگہ نا انتظامیہ تون ہم ہیت مسنے۔ او پارے کہ گوازی گر تے پی ایس ایل اٹی پیمنٹ نا کمی نا ویل مون تروک اف۔ کرار کرار آ پیمنٹ ودنگ اٹی ءِ۔ لیگ اٹی ٹیم تا کچ اٹ ودکی نا بابت منیجمنٹ کمیٹی نا سروک نا پاننگ ئس کہ فرنچائزر آتیان ہفتمی و ہشتمی ٹیم ءِ اوار کننگ کن ہیت کننگ اٹی اُن۔ ٹیم تے ودفنگ اسہ چیلنج اسے، ولے اومیت ءِ کہ دا بابت سرسہب مرینہ، او پارے کہ چارسال اٹ اسٹیڈیم انفرا اسٹرکچر آ ہچ کاریم متنے، ای کاریم مفننگ آ حیران ہم اریٹ فریشان ہم۔ پی ایس ایل شیڈول نا رد اٹ اولیکو میچ دفاعی چمپئن لاہور قلندرز و ملتان سلطانز نا نیام اٹ درمیان 13 فروری آ ملتان اٹی مریک۔ 34 میچ آن 11 میچ راولپنڈی ٹی مریرہ، کراچی و لاہور اٹی 9، 9 میچ، ملتان اٹی 5 میچ مریرہ، و دا رد اٹ کوئٹہ ٹی ہچ ءُ میچ اس مفک۔ پاکستان سپر لیگ نا فائنل 19 مارچ آ قذافی اسٹیڈیم لاہور اٹی مریک۔
(تلار حوال)