بلوچستان مالی تنکی نا گواچی ءِ، بنجا کمک کپننگ اٹی ءِ، میر اسد بلوچ

بنجا غا بلوچستان نا آئینی و کانودی حق انا ر داٹ 40 ارب روپئی بیٹ ءُ، این ایف سی ایوارڈ نا اِرا وال نا بقایا غاک رسینگتنو، صوبائی وزیر کشت و کشار

0

Get real time updates directly on you device, subscribe now.

کوئٹہ:صوبائی وزیر کشت وکشار میر اسد بلوچ پارینے کہ بلوچستان داو خت آ مالی تنکی ناگواچی ءِ‘ بنجا بلوچستان ءِ اونا آئینی وکانودی حق ءِ ترسا اونا 40ارب روپئی ءِ ایتے ہرا این ایف سی ایوارڈ تدوک آسال و دا سال انا سَے ماہی بقایا غاک رسینگتنو‘ نوکاپ اٹ پڑو کروک 10ارب روپئی آن اسہ پیسہ اس ہم بلوچستان ءِ رسینگتنے‘ بنجا ناکنڈآن مچ آدنیا غان چندہ مچ کننگا ولے ننے ہچ ءُ فنڈ اس تننگتو‘ گدرینگوک آ 75سال اٹ بنجا نا کنڈآن مالیاتی ادارہ غاتیان ہلوک وام تا 5درسَد ہم بلوچستان نا خڑچ متنے‘ نن نسخان اٹ اوار ان ولے فائدہ ٹی ننے ہچ رسینگپک‘ دا رویہ ءِ السا بلوچستان نامشکل و الس نایل آتے ایسر کننگ ءِ پک کننگ کن ننا حق ءِ تننگے‘ نن پیکیج نا خواست کپننگ اٹی ان۔ دا خیال آتا درشانی ءِ او پنچ شنبے نادے تینا دفتر اٹ پریس کانفرنس نا وخت آ کرے۔ میر اسد بلوچ پارے کہ بلوچستان دا وخت آ بھاز مالی تنکی ناگواچی ءِ و وزیراعلیٰ بلوچستان میر عبدالقدوس بزنجو، صوبائی وزیر خزانہ ہم وزیراعظم تون اوار بنجا غان صوبہ نا مالی وپوزیشن نا بابت ہیت کرینو ولے این ایف سی ایوارڈاٹ رسینگوک تدوک آ سال انا 11ارب روپئی داسکان تننگتنو و ساڑی سَے ماہی نا بقایا غاک ہم رسینگتنو و بنجا نا کنڈآن نمن ہم مفننگ انگ ءِ ونئے پیسہ تننگ نابابت سجیدہ و پک ورندی تننگ انگ ءِ اگہ ہندا رویہ برجاسلیس تو صوبہ تینا ملازم آتے تنخواہ ہم تننگ کپک‘ ننا جماعت سیاسی ءِ و نن بحیثیت صوبائی حکومت بنجا آن خواست کننگ اٹی ان کہ بلوچستان ءِ اونا حق ءِ تننگے صوبہ غان خیسن‘ کاپر، زر و ایلو معدنیات آک پیش تمرہ و اوٹی ریکوڈک، سی پیک، سیندک تون اوارا یلو معدنیات آن نیمہ پاکستان نا رقبہ غا تالان مالدار صوبہ واونا حکومت مالی تنکی تا گواچی مرے و مخلوق بے روزگاری و کبینی نا نسخل اٹ نسنگے تو دا حالیت آتے ٹی بنجا بایدے تینا آئینی کڑدار ءِ سر ترا جمہوریت کن صوبہ ء اونا حق ءِ ایتے‘ بنجا سہ ماہی نا بقایا 40ارب و تدوک آسال این ایف سی نارد اٹ 11ارب روپئی کم تسنے نن پیکیج نا خواست کپننگ اُن بلکہ تینا حق ءِ خواہنگ اٹی ان۔ جنیوا کانفرنس اٹ بلوچستان بھس کاری تے 40ملک انا بندغ آتے نشان ترسا 10ارب ڈالر مچ کننگا ہرافتیان بلوچستان ءِ ارا ارب ڈالر نا فنڈ ترسا اونا وختی گرج آتے پورو کننگ مریک و آخبتی بنداو آ دانا ایسری کن گام گیج کرسا مثبت پالیسی جوڑ کرسا دا وڑ انا چیلنج آتتون مون تننگ کن بنجا صوبائی حکومت آتا اواری اٹ گام گیج کے تاکہ اسہ مثبت و جم پالیسی اس ترتیب ترسا دا حالیت آتیان ملک وقوم ءِ کشنگے۔

(آن لائن)

Get real time updates directly on you device, subscribe now.

Leave A Reply

Your email address will not be published.