پی ڈی ایم نا قومی اسمبلی ٹی پی ٹی آئی ءِ پدی الیپننگ نا فیصلہ

اسلام آباد:پی ڈی ایم نا حکومت ہم قومی اسمبلی ٹی تحریک انصاف ءِ پدی الیپننگ نافیصلہ کرینے‘ تحریک انصاف نا پین 25 آن 30 باسک انا استیفہ غاتے ہم منظور کننگ نا گمان ارے۔ سپیکر آ ہندا باسک آتا استیفہ غاتے منظور کننگ نا ایڈوائس راہی کننگا‘ اسہ کنڈآ تحریک انصاف قومی اسمبلی ٹی بننگ کن کسر ءِ ساف کننگ ءِ تو ایلو کنڈآ پی ڈی ایم کسراٹ اڑاند شاغنگ اٹی ءِ۔ حوالی نا رد اٹ سیکرٹری قومی اسمبلی طاہر حسین اسپیکر راجہ پرویز اشرف تون اونا اُراٹی اوڑدہی کرے ہراٹی تحریک انصاف نا پین 25 آن 30 باسک انا استیفہ غاتے منظور کننگ نا بابت سلابت کننگانے‘ دا بابت قومی اسمبلی نا کانود جوڑ کروک بشخ ہم ہورک ورک ءِ پورو کرسا فائل ءِ اسپیکر آ راہی کرینے‘ ہراٹی اسپیکر ءِ ہمو باسک آتا استیفہ غاتے منظور کننگ نا ایڈوائس تننگانے‘ حوالی نا رد اٹ داسہ اسپیکر نا واکداری ءِ کہ او ہراتم باسک آتا استیفہ غاتے منظور کرسا الیکشن کمیشن آ راہی کیک‘ داکان مست ہم تحریک انصاف نا 35 باسک انا استیفہ غاتے اسپیکر اناگت الیکشن کمیشن آراہی کریسس۔ ایلو کنڈ آ اسپیکرقومی اسمبلی راجہ پرویز اشرف پارینے کہ تحریک انصاف نا ڈل کن تون اوڑدہی کننگ کن بس ہرا بندغ آک بسریا ہرافک میڈیا غا استیفہ غاتا بابت پاریر و کنے است جم کریر ای است جم مننگ آن پد اوفتا استیفہ غاتے منظور کریٹ۔ دا خیال آتا درشانی ءِ راجہ پرویز اشرف میڈیا تون ہیت وگپ کرسا کرے۔ راجہ پرویز اشرف پارے کہ تحریک انصاف نا ڈل کن تون اوڑدہی کننگ کن بس یا ہرافک میڈیا غا استیفہ غاتابابت پاریر و کنے است جم کریر ای ہمو باسک آتا استیفہ غاتے منظور کریٹ‘ ہرا ہرافک کنے است جم کریر اوفتا استیفہ غاک منظور مسر‘ کن تو پی ٹی آئی نابھاز آ باسک آک رابطہ کرسا پاریر کہ او داسکان دا بابت سجفنگ ءُ‘ ہراتم استیفہ غاتے منظور کریٹ تو غوغا کننگا و اگہ منظور متوس تو ہم غوغا کننگک۔ اسہ سوج اسے نا ورندی ٹی راجہ پرویز اشرف پارے کہ عمران خان پدی بننگ نااشارہ تسنے تو استیفہ غاتے منظور کننگا تو دا وڑ انا ہچ ءُ ہیت اس اف ہراتم پی ٹی آئی ڈل بس تو منظوری ناعمل بنا کریسس‘ ای داسہ ہم خواوہ کہ ہرافتا استیفہ غاک منظور متنو او پدی اسمبلی آبریر۔

(آن لائن)