لمئی زبان تیان بے چکاری نا غاو

بلوچی زبان اٹ ایم فل و پی ایچ ڈی کروک آ بلوچ ورناک پریس کلب کوئٹہ ٹی پریس کانفرنس کرسا وخت انا حکومت آن خواست کرینو کہ بلوچستان اٹ لمئی بولی تے کن پوسٹ پک کننگے۔ اوفک پاریر ساڑی حکومت نا لمئی بولی نا بابت ہچ ءُُ گام گیج اس خننگ پننگ ءِ۔ اسکول، کالج، ڈی جی پی آر، محکمہ دود ربیدہ و آثار قدیمہ ٹی بلوچی براہوئی و ایلو لمئی آ بولی تا پوسٹ تننگے۔ او پاریر کہ دنیا ٹی ہر قوم انا تینا لمئی بولیک مریرہ۔ لمئی بولی تا شونداری و رکھ اکن اقوام متحدہ نا کنڈ آن ہرسال 21فروری آ لمئی بولی تا جہانی دے اڈ تننگک۔ ہرانا مسخت دنیا ٹی بے چکاری نا سوب آن نزور مروک آ بولی تا رکھ و لمئی بولی تیٹی تعلیم ءِ لس کننگ ءِ۔ پاکستان اٹ بلوچی و براہوئی بلوچ قوم انا زبانک ءُ، ہرا ہزار آ سال متکن ءُ تاریخی ءُُ حیثیت اس تخرہ۔ ہرافتیٹی بلوچ قوم انا تاریخ، سیاست و دود ربیدہ ساڑی ءِ، ولے سرکاری کاٹم خواجہ ئی مفننگ نا سوب آن بلوچی و براہوئی بولی ءِ کیہی خلیس آک دوئی مسنو۔ او پاریر کہ بلوچی براہوئی بولی ءِ اولیکو وار 90 نا دہائی ٹی ہمو وخت انا صوبائی حکومت کل تعلیمی ادارہ غاتیٹی رواج تننگ نا پڑو ءِ کرے وخت اس کہ اوکان پد 2014ء ٹی بلوچستان نا صوبائی حکومت ہم اسمبلی ٹی بل اس پاس کرسا بلوچی براہوئی بولی تون اوار پشتو ءِ تعلیم نا وڑ جوڑ کننگ نا پڑو کرے، ولے حکومتی بے چکاری و ڈٹ بندی مفننگ آن دا ہیت چُپ مس۔ او مستی پاریر کہ دا وخت آ شعبہ بلوچی جامعہ بلوچستان، انسٹی ٹیوٹ آف بلوچی لینگویج اینڈ کلچر تربت یونیورسٹی، علامہ اقبال اوپن یونیورسٹی، نیشنل یورنیورسٹی آف ماڈرن لینگویجز اٹ بلوچی خوانفنگ انگ ءِ۔ وخت اس کہ جامعہ کراچی ٹی سرٹیفکیٹ کورس ہم کرفنگ انگ ءِ۔ و ہندا منہ وخت اٹ غازی خان یونیورسٹی پنجاب ہم شعبہ بلوچی نا پڑو ءِ کرینے۔ ہندا ادارہ غاتیٹی سال اٹ سد آتا کچ اٹ طالب علم آک بی ایس، ایم اے، ایم فل و پی ایچ ڈی نا ڈگری دوئی کرسا فارغ مننگ اٹی ءُُ، وخت اس کہ اسکول و کالج لیول اٹ بلوچی نا پوسٹ مفننگ آن دا کل بندغ آک بے روزگار ءُُ، اوفک پاریر کہ بلوچستان نا سرکاری کالج آتیٹی گڈیکو وار 2011 ٹی بلوچی نا گڑاس پوسٹ بسوسر ولے اوکان پد بلوچی نا ہچ ءُُ پوسٹ اس بتنے۔ و نئے بلوچی نا ریٹائرڈ پروفیسر آتا خالی آ پوسٹ آتا پڑو ءِ کننگانے۔ او پاریر کہ آئین پاکستان نا آرٹیکل 251 نا رداٹ ہر شاری ءِ تینا لمئی بولی نا رکھ انا حق دوئی ءِ۔ و بلوچی براہوئی، و پشتو ءِ اسکول آتیٹی خوانفنگ کن پاس کروک بل ہم ساڑی ءِ، ولے ولدا ہم اسکول آتیٹی اسامی اف۔ وخت اس کہ ڈرائنگ، عربی، پی ٹی آئی کن اسکول آتیٹی اسپیشل سبجیکٹ نا استاد آک ساڑی ءُ۔ تو لمئی بولی تے کن ہم سبجکٹ اسپیشلسٹ استاد تعینات کننگے۔ اوفک وخت انا حکومت آن خواست کریر کہ انٹر و ڈگری کالج آتیٹی لمئی بولی تا لیکچرر و اسسٹنٹ پروفیسر آتا اسامی تا پڑو کننگے، و ریٹائرڈ مروک پروفیسر آتا اسامی تے دوارہ پر کننگے۔ اوفک پاریر کہ ڈی جی پی آر اٹی بلوچی، براہوئی، و پشتو نا رسالہ و اخبار تا مانیٹرنگ کن اسامی تخلیق کننگے۔ ادارہ دود ربیدہ و آرکیالوجی ٹی بلوچی، براہوئی و ایلو لمئی زبان تا ادب، و تاریخ آ ریسرچ کن ریسرچر نا اسامی تا پڑو کننگے۔ رجسٹرڈ ادبی ادارہ غاتیٹی ریسرچ سینٹر جوڑ کرسا اوفتے کن اسامی تا پڑو کننگے۔ اوفک پاریر کہ ڈائریکٹریٹ آف اسکولز و کالجز اٹی بلوچی براہوئی و ایلو لمئی بولی تا نصاب ءِ جوڑ کننگ کن ہم سبجیکٹ اسپیشلسٹ نا اسامی جوڑ کننگے۔ پریس کانفرنس نا اخیر اٹ اسکالر آک حکومت آن تینا خواست آتا پورو مفننگ آ لمئی بولی تا حق اکن کانود نا دنگ اٹ مرسا سخت لائحہ عمل اس دوئی کننگ اسکان نا گام ہرفنگ نا ہم پاریر۔پریس کانفرنس کروک اسکالر آتا خواست آک یخین اٹ حق آٹو، و اوفک ہرا ہیت آتے کرینو، اوفتیان نمن مننگ مفک۔ بایدے حکومت دا کنڈ آ چکار کے۔ ولے راستکی دادے کہ حکومت دا کنڈ آ اسُل خن تے تر کرینے۔ اسکول آتیٹی نصاب نا کتاب آک اریر، ولے خوانفوک کس اف۔ یونیورسٹیک جوڑ ءُ، ولے اوفتیٹی لمئی زبان تا بشخ ءِ تخنگ تنے۔ خاص وڑ اٹ براہوئی زبان تون تو بھاز بیدادی مننگ ءِ کہ بلوچی زبان نا بشخ تو منہ یونیورسٹی اسے ٹی ارے، ولے بلوچستان یونیورسٹی آن بیدس پین اسہ یونیورسٹی اسے ٹی ہم براہوئی نا بشخ اف۔ تربت یونیورسٹی نا اولیکو وائس چانسلر براہوئی ہیت کروک بلوچ اس ئس، ولے او ہم دا کنڈ آ ہچ ءُ چکار اس کتو۔ باید دادے کہ پین مف بلوچستان اٹ اخس کہ یونیورسٹی اریر، اوفتیٹی اگہ بلوچی نا بشخ ارے، تو دا جوان ءُ ہیت اسے، و اوڑے براہوئی نا بشخ ہم ٹہیفنگے، و ہندن ہراڑے کہ ہڑتوم آ بولی تا بشخ آک افس، دن کہ یونیورسٹی آف مکران، پنجگور، یونیورسٹی آف گوادر، میرچاکرخان یونیورسٹی سبی، لسبیلہ یونیورسٹی اوتھل و وومن یونیورسٹی کوئٹہ، یونیورسٹی آف لورالائی، خضدار یونیورسٹی، تیٹی ہم بایدے شعبہ بلوچی و براہوئی جوڑ کننگے۔ تاکہ ہڑتوم آ زبان تیا پٹ و پول نا کاریم شون ہلنگ کے۔