ایرانی صدر تون اوڑدہی بھاز گچین و بھرمی ئسکہ، شہباز شریف
نن آخبت نا کمکاری نا روڈ میپ کن واپار، زرکاری، انفارمیشن ٹیکنالوجی، کشت و کشار و بجلی نا بشخ آتے اولیت تسن
Get real time updates directly on you device, subscribe now.
اسلام آباد: وزیراعظم محمد شہباز شریف پارینے کہ مند پشین بارڈر مارکیٹ و گبد پولان ٹرانسمیشن لائن ڈٹ آتیان راجی و اقتصادی شونداری نا پوسکن ءُ وارخواہی ودی مریک و مخلوق نا زند انا آب بڑز مریک۔ جمعہ نادے آ تینا ٹویٹ اٹی وزیراعظم پارے کہ ایران نا صدر ڈاکٹر ابراہیم رئیسی تون اونا بے کچ تعمیری و بھرمی اوڑدہی مسنے۔ اوڑدہی ٹی ہڑتوم آ کنڈآتا تعلقداری نا مون آ دننگ کن اجتماعی کوشست آتے ترند کننگ آ امنا مسنے۔ وزیراعظم پارے کہ نن آخبت نا کمکاری نا روڈ میپ اکن واپار، زرکاری، انفارمیشن ٹیکنالوجی، کشت وکشار و بجلی نا بشخ آتے اولیت جوڑ کرینے، دا مسخت کن آجو واپار نا معاہدہ غا کاریم نا رفتار ءِ ترند کننگ ءِ اولیت تننگک۔ وزیراعظم پارے کہ بلوچستان نا مخلوق کن اسہ یات گار ءُ دے اس ئسک۔ مند پشین بارڈر مارکیٹ و پولان گبد ٹرانسمیشن لائن نا اسیجا بناآن راجی وا قتصادی شونداری نا پوسکن ءُ وارخواہی ودی مریک و مخلوق نا زند انا آب بڑز مریک۔ اوپارے کہ سیمی منڈی تا کمک اٹ واپار نا بھلو گنجائشت اسے ہرافتیان نن فائدہ ہرفنہ، مند پشین بارڈر مارکیٹ 6 سیمی مارکیٹ آتیان اسٹ ءِ۔ اوپارے کہ ہمو غٹ مخلوق ءِ خراج تحسین پیش کیوہ ہرافک 2009 آن زیر التواٹرانسمیشن لائن ڈٹ انا ریکارڈ چار تُو اٹی پوروی ءِ پک کرینو۔
(اے پی پی)