ژوب،امیر جماعت اسلامی سراج الحق آ خودکش جلہو، کلہ بچا

سراج الحق جلسہ سے آ ہناکہ، دھماکہ گاڈی نا خڑک آ مس، بمب پورو ترختو، قافلہ غا مروک خود کش جلہو اٹ اسہ بندغ زوال مس، پنچ بندغ ٹھپی مسر

0

Get real time updates directly on you device, subscribe now.

ژوب / اسلام آباد/ کوئٹہ: ژوب اٹ جماعت اسلامی نا امیر سراج الحق نا قافلہ غا خودکش جلہو اٹ اسہ بندغ اس زوال وخت اس کہ بنچ بندغ ٹھپی مسر‘ حوال نا رد اٹ جمعہ نا دے جماعت اسلامی نا امیر و سینیٹر سراج الحق ژوب اٹ اڈ تروک جلسہ ٹی بشخ ہلنگ کن قافلہ نا دروشم اٹ ہناکہ۔ سراج الحق ءِ بخیر کروک جلوس اٹ سراج الحق نا گاڈی نا خڑک آ خودکش دھماکہ مس ہراناسوب آن جلہوگیرزوال مس و پنچ پین بند ٹھپی مسر۔ دھماکہ غان گاڈی تے نسخان مس و دھماکہ غان گڈ مخلوق دانگ اینگ نرا‘ خودکش جلہو نا ڈہ ءِ جماعت اسلامی نا کنڈآن تننگا۔ حوالی نا رد اٹ خودکش جلہوگیر نا جیکٹ پورو وڑ اٹ ترخنگ کتو۔ دھماکہ نا ڈہ رسینگ آ ہندی انتظامیہ و پولیس جاگہ غاسرمس و علاقہ ءِ گھیڑ کرسا ٹھپی تے ہسپتال آ گدریفے‘ پولیس نا رد اٹ ژوب بازار اٹ اڈ تروک جلسہ ٹی بشخ ہلنگ کن بننگ ناوخت آ بس اڈہ نا خڑک آ سراج الحق نا قافلہ غا جلہو کننگا۔وزیرِاعظم محمد شہباز شریف امیرِ جماعتِ اسلامی سراج الحق نا قافلہ غاخودکش جلہو نا مذمت ءِ کرینے۔ وزیرِاعظم واقعہ ٹی کارندہ غاتا ٹھپی مننگ آ ڈکھ وارمان کرینے‘ وزیراعظم واقعہ نا جاست پاست کننگ نا پرمان کرے۔ وزیرِاعظم ٹھپی تا زوت دراخ جوری کن دعا کرے۔ وزیرِاعظم تعلقدار کمامدار آتے ٹھپی تے گچین طبی آسراتی فراوان کننگ نا پرمان کرینے۔وزیراعلیٰ بلوچستان میر عبدالقدوس بزنجو ژوب اٹ امیر جماعت اسلامی سراج الحق نا قافلہ ناخڑک آ دھماکہ نا مذمت ءِ کرینے‘ وزیراعلیٰ دہشت گردی نا واقعہ ٹی امیر جماعت اسلامی نا رکھوک مننگ آ است جمی نا درشانی کرسا پارینے کہ اللہ تعالیٰ نا شکر ءِ کہ او امیر جماعت اسلامی و اونا سنگت آتا حفاظت ءِ کرے۔وزیراعلیٰ واقعہ ٹی پنچ بندغ نا ٹھپی مننگ آ ارمان کرینے‘ وزیراعلیٰ ژوب انا ہسپتال آتے ٹی ایمرجنسی نافذ کننگ و ٹھپی تے درمان نا گچین آسراتی فراوان تون اوار امیر جماعت اسلامی و اونا سنگت آتا سکیورٹی ءِ پین گچین کننگ ناپرمان کرینے‘ وزیراعلیٰ پارینے کہ دہشتگرد آک بے ایمنی تالان کرسا تینا مسخت آتے پورو کننگ خوارہ ولے دہشت گرد و اوفتا کاٹم خواجہ غاتا ناپاک ارادہ غاک سرسہب مننگ کپسہ۔ وزیراعلیٰ امیر جماعت اسلامی نا درازی عمر‘ دراخ جوڑی و سلامتی کن نیک انگا استخواہی تا درشانی ہم کرینے۔حوالکاری سلاہکار بلوچستان مٹھا خان کاکڑ ژوب اٹ امیر جماعت اسلامی سراج الحق نا قافلہ غا خود کش دھماکہ نا مذمت ءِ کرسا دہشت گردی نا واقعہ ٹی امیر جماعت اسلامی نا رکھوک مننگ نا آست جمی درشان کرینے‘ حوالکاری سلاہکار واقعہ ٹی پنچ بندغ نا ٹھپی مننگ آ ارمان کرینے۔ حوالکاری سلاہکار پارے کہ ژوب انا الس مہمان نواز محب وطن و پرامن ءِ و دہشت گردی نا سختی اٹ مخالفت ءِ کیک و پیشن ناتے ژوب و بلوچستان نا پرامن چاگڑد ءِ خراب کننگ کن الیپنہ۔ صوبائی سلاہکار ژوب اناالس و بی اے پی نا کاندہ غاتے جماعت اسلامی نا کارندہ غاتتون کمک و یکجہتی نا پارت کرینے و دا عزم انا درشانی کرینے کہ کس ءِ ہم ژوب انا پرامن چاگڑد ءِ خراب کننگ کن الیپنہ۔ترجمان حکومت بلوچستان فرح عظیم شاہ ژوب اٹ امیر جماعت اسلامی سراج الحق نا قافلہ غا دھماکہ نا مذمت ءِ کرسا پارے کہ دہشتگرد آک تینا مسخت اٹ سرسہب مفسہ‘ اللہ نا لکھ شکر ءِ کہ جماعت اسلامی ناامیر و ایلو راہشونک دھماکہ ٹی رکھوک مسر۔ ترجمان حکومت بلوچستان ٹھپی تا زوت دراخ جوڑی کن دعا کرے۔ اوپارے کہ امن دشمنک صوبہ ناپرامن چاگڑد ءِ خراب کننگ نا بے سہب کوشست کننگ اٹی ءُ‘ دہشتگردی ءِ ہر حال اٹ چٹفنگک۔

(آن لائن/ اے پی پی / خ ن)

Get real time updates directly on you device, subscribe now.

Leave A Reply

Your email address will not be published.