بنجائی کابینہ نا دیوان، قومی سلامتی کمیٹی نا فیصلہ غاک پک

اسلام آباد : بنجائی کابینہ 16 مئی آ اڈہلوک قومی سلامتی کمیٹی نا دیوان اٹ کروک فیصلہ غاتے پک کرینے‘ جاری کروک اعلامیہ نا رد اٹ وزیراعظم محمد شہباز شریف ناکماشی ٹی بنجائی کابینہ نا دیوان جمعہ نا دے وزیراعظم ہاؤس اسلام آباد اٹ اڈہلک‘ بنجائی کابینہ نا باسک آتے بخیر کرسا وزیراعظم اوفتے تینا تدوک آدے انا پاک۔ایران سیم انا دورہ نا سرجم آتیان معلومدار کرے۔ وزیراعظم پارے کہ ایران تون چندی بشخ آتے ٹی کمک ءِ ودفنگ نا خواہندار ان۔ ایرانی صدر نا جند انا استخواہی و وزیراعظم نا جند انا چاروکی ٹی ایران آن 100 میگا واٹ اڑزان بجلی نا درآمد کننگ نا ڈٹ چنکو وخت اسے ٹی پورو ہراکہ بھلو وخت اسے آن سلوک ئس۔دا ڈٹ آن سویلی بلوچستان خاص وڑ اٹ گوادر اٹ بجلی نا سر کننگ ءِ پک کننگانے‘ دا ڈٹ آن بلوچستان نا پدتموک علاقہ غاتے ٹی شونداری و شونہالی بریک‘ ہندا وڑ ”مند۔پشین بارڈر مارکیٹ“ نا بناءِ ہم کننگا‘ ہراڑان پاک ایران سیم انا ہڑتوم آ کنڈآن رہینگوک آتیکن کاروبار وپوریا نا پوسکن ءُ وارخواہی رسینگرہ و شونداری نا پوسکن ءُ سفر اسے نا بنا مریک۔ وزیراعظم پارے کہ ایرانی صدر پاک ایران واپاری ءِ ودفنگ آ خصوصی استخواہی نا درشانی کرے‘ داڑتون اوار کشت وکشار‘ سائنس و ٹیکنالوجی و شمسی توانائی نا بشخ آتے ٹی کمک آ ہم جوان گپ وتران مس۔ وزیراعظم پارے کہ وزیر خارجہ ناکماشی ٹی اسہ بڑزکو کہولی ڈل اس ایران نا دورہ ءِ کیک تاکہ دا امور تیا پک پیش رفت مرے۔ وزیراعظم کابینہ ناباسک آتے پارے کہ ہڑتوم آملک آک 900 میل بھلا سیم آ کراس بارڈر ٹیرائیرزم ءِ توننگ کن اسیجائی کوشست کننگ نا زور شاغار و سکیورٹی نا نظام ءِ پین گچین کننگ آرضامندی درشان کریر۔ وزیراعظم پارے کہ ایران نا صدر ءِ پاکستان نا دورہ کننگ نا سلہ خلکنٹ ہرادے او امنا کرینے۔ وزیراعظم دا وخت آ پرمان کرے کہ پٹرول و ڈیزل نا نہاد آتے ٹی کمتی نا فائدہ غاتے دمدستی الس اسکان سر کننگے۔ وزارتِ داخلہ و مچ آ ملک انا ضلعی انتظامیہ ایلو گڑاتا نہاد آتے ٹی کمتی ءِ پک کے و ناروا کٹیا کروک آتا برخلاف سخت کارروائی کننگے۔ وزیراعظم کابینہ نا باسک آتے سعودی عرب تون سَے شنبے نادے دستخط کروک ”روڈ ٹو مکہ“ معاہدہ نا سرجم آتیان ہم معلومدار کرے‘ ہراڑان پاکستانی حاجی تا بھلو کچ اسے فائدہ مریک۔ دا معاہدہ نا رد اٹ اسلام آباد ایئرپورٹ آن 26143 پاکستانی حاجی تا امیگریشن نا عمل اسلام آباد ایئرپورٹ آ مریک و او سعودی ایئرپورٹ آ بھلا انتظار آن بچرہ۔ دا معاہدہ غا دَرو آن عملدرآمد نا بنا مسنے۔ وزیراعظم دا اومیت درشان کرے کہ سعودی حکومت نا کمک اٹ بروک آسال لاہور و کراچی آن ہم ہنوک حاجی تے دا آسراتی رسینگ کیک۔ بنجائی کابینہ راولپنڈی ٹی انشورنس ٹریبونل جوڑ کننگ نا منظوری ءِ تس‘د ا پوسکن آ ٹریبونل آ پین ہچ ءُ ودکی خڑچ اس بفک بلکہ ساڑی احتساب عدالت نمبر4 ءِ انشورنس ٹریبونل اٹ بدل کننگک۔ بنجائی کابینہ کابینہ کمیٹی برائے لیجسلیٹو کیس تا 11 مئی 2023 آ اڈہلوک دیوان اٹ کروک فیصلہ غاتے ہم پک کرے۔

(آن لائن)