صدر مملکت نا مسلم باغ دہشتگرد جلہو نا شہید آتا خاہوت آتتون گپ وتران

اسلام آباد: صدر مملکت ڈاکٹر عارف علوی شہید آتے قوم انا میرات گوندسا پارینے کہ قوم اوفتا قربانی تے اسُل است آن دپک۔ جمعہ نادے آ ایوان صدر نا پریس ونگ آن جاری بیان نا رداٹ صدر مملکت دا خیال آتا درشانی ءِ 12 مئی نا مسلم باغ بلوچستان دہشت گرد جلہو نا شہید آتا خاہوت آتون ٹیل فون آ گپ وتران کرسا کرے۔ صدر مملکت شہید آتا وطن کن خذمت آتا ستاءِ کرے و قوم انا کنڈآن اوفتے شاندار لوز آتیٹی خراج عقیدت پیش کرے۔ اوشہید آتے خراج عقیدت پیش کرسا قوم اکن خذمت آتیا اوفتے سلام پیش کرے۔ صدر مملکت شہید آتا وارث آتون گپ وتران اٹی ڈکھیائی و غم انا درشانی ءِ کرے۔ شہید آتا وارث آتون گپ و تران اٹی صدر مملکت نا خنک خڑینکی مسر۔ صدر مملکت حوالدار عبدالرحیم، محمد عرفان وندیم اقبال نا خاہوت آتون فون آ گپ وتران کرے۔ او سٹینو ٹائپسٹ غلام فرید و سینٹری ورکرز صابر مسیح و شان مسیح نا وارث آتون ہم گپ وتران کرے۔ صدر ڈاکٹر عارف علوی لانس نائیک فہیم مشتاق و سپاہی سعید اسلم و طلحہ جامی نا وارث آتون فون آ ہڑزخواہی کرے۔ صدر مملکت داوخت آ گپ وتران کرسا پارے کہ شہید آک قوم انا میرات ءُ، قوم اوفتا قربانی تے اسُل است آن دپک۔ او شہید آتا وطن کن خذمت آتا ستاءِ کرے و قوم انا کنڈآن اوفتے خراج عقیدت پیش کرے۔

(اے پی پی)