بھسکار نوکاپ نا 3 کروڑ زہمی تے بچفنگا، چیئرمین ایم ڈی اے

اقوام متحدہ: پاکستان آفت آتیان خطرہ غاتے کم کننگ نا عزم انا درشانی ءِ کرسا پارینے کہ حکومت تدوک آ سال بھسکار نوکاپ آن پد شاندار کارکڑد نا درشانی ءِ کرسا، مسہ کروڑ آن زیات زہمی تے دمدستی خطرہ غاتیان بچفنگ کن ترندی اٹ ریسکیو و ریلیف نا کارروائی تے کرینے۔ چیئرمین این ڈی ایم اے لیفٹیننٹ جنرل انعام حیدر ملک اقوام متحدہ نا 193 باسکی جنرل اسمبلی نا اِرادے ئی دیوان ءِ پارے کہ پاکستان نا حکومت بھلا مالی چیلنج آتیان پد ہم نوکاپ آن زہمی مخلوق ءِ دمدستی خطرہ غاتیان کشنگ و اوفتا گرج آتے پورو کننگ کن حکومت پاکستان پبی عزم انا درشانی ءِ کرے۔ چیئرمین این ڈی ایم اے سینڈائی فریم ورک فار ڈیزاسٹر رسک ریڈکشن 2015-30آ نظرثانی کن اڈ ہلوک بڑزکو کہول انا دیوان ءِ پارے کہ چاگڑدی بدلی تا سوب آن بروک آ نوکاپ اٹی 1700 مرک آتون اوار اوار اسہ تہائی ملک نوکاپی دیر اٹی ڈبنگا ہراڑان مروک آ نسخانک 30 ارب ڈالر اسکان سرمسر۔ ہنداوڑ پاکستان ءِ بحالی و پوسکن تفنگ نا تینا ڈٹ آتے عملی دروشم اس تننگ اٹ اسہ مشکل چیلنج اس مون تروک ءِ۔ اوپارے کہ پاکستان نا فوج، خاص وڑاٹ فوج انا کماشی ٹی ریسکیو و ریلیف نا کارروائی تیان بحالی نا بنائی ریسہ غاتے سوگو کننگ اٹ کمک رسینگا۔ ہراٹی نسخان و اثرآتا بھاز زیات مون ءِ توننگا۔ اوداوخت آ گلوبل ڈیزاسٹر ریسک ریڈکشن فنڈ انا ٹہیفنگ نا سلاہ پیش کرے تانکہ دا بابت علاقائی کہول آ ڈیزاسٹر رسک ریڈکشن نا گرج آتے چاگڑدی مالی کمکاری آن جتا کننگ مرے۔ اومندوبین آتے پارے کہ پاکستان زمی جمب آن زہمی ترکی و شام اکن کمک نا دوءِ مون آ کرے و 10 ہزار ٹن آن زیات کمکی گڑافضائی، ڈغاری و سمندری کسر تے اٹ روانہ کرے۔ اوپارے کہ حکومت پاکستان آفت آتا خظرہ غاتیٹی کمتی کن سینڈائی فریم ورک ءِ نافذ کننگ کن پور و وڑاٹ سنبرینگوک ءِ۔ اوداوخت آ اسیجائی معلومداری وٹیکنالوجی اسکان رسینگ نا خواست ہم کرے تانکہ نزور ملک آتے وخت آن مست وارننگ نا لائخی دوئی کننگ اٹ کمک ملنگ کے۔ اوپارے کہ چاگڑدی بدلی تا خطرہ غاک جہانی ءُ و اوفتے تون مون تننگ کن جہانی کہول آ ردعمل نا گرج ءِ۔

(اے پی پی)