مستونگ کلی کاریز سور اٹی پولیو ٹیم آ سم کاری، پولیس کارندہ اس شہید

کوئٹہ: بلوچستان نا علاقہ مستونگ کلی کاریز سور اٹی پولیو ٹیم آ نادرست سلہہ بند بندغ آتا سم کاری آن پولیو ٹیم انا رکھ آ سلوک پولیس کارندہ اس شہید مس۔ پولیس نا رداٹ جمعہ نادے آ مستونگ کلی کاریز سور اٹی پولیو ٹیم آ نادرست سلہہ بند بندغ آک سم کاری کریر و موقع غان نرار، سم کاری ٹی پولیو ٹیم انا رکھ آ سلوک پولیس کانسٹیبل شہزاد احمد زوال مس، پولیس و سیکورٹی فورس آک واقعہ نا جاگہ غا سرمرسا لاش ءِ شہید نواب غوث بخش رئیسانی میموریل ہسپتال آ گدریفیر۔ پولیس و سیکورٹی فورس آک علاقہ نا ناکہ بندی ءِ کرسا دوبہ دار آتا پٹنگ نا بناءِ کرینو۔ شہید کارندہ مسکوہی ایس ایچ او سٹی شہید عبدالقدوس بنگلزئی نا مار ءِ۔ وزیراعلیٰ بلوچستان میر عبدالقدوس بزنجو مستونگ اٹی پولیو ڈپٹی آ تعینات پولیس کارندہ غا سم کاری نا واقعہ نا مذمت ءِ کرینے۔ وزیراعلیٰ ہاؤس آن جاری بیان اٹی سم کاری آن کانسٹیبل محمد شہزاد نا شہید مننگ آ ڈکھیائی و است ہسونی نا درشانی ءِ کننگانے۔ وزیراعلیٰ پارے کہ پولیو مہم ءِ بے سہب کننگ نا سازش اٹی اوار زموار آک قوم انا دشمن ءُ۔ اوپولیس و انتظامیہ ءِ پارت کرے کہ او دہشت گرد زموار آتے کانود نا گرفت اٹ اتیر۔ اوپارے کہ تینا چناتا دراخ جوڑ آخبتءِ پک کینہ۔ وزیراعلیٰ شہید کانسٹیبل نا درجہ غاتے بڑز و خاہوت کن صبر وجمیل نا دعاکرے۔ ترجمان حکومت بلوچستان فرح عظیم شاہ مستونگ اٹی پولیو ڈیوٹی آ تعینات پولیس کارندہ غا سم کاری نا واقعہ نا مذمت ءِ کرینے۔ جاری بیان اٹی او سم کاری ٹی کانسٹیبل محمد شہزاد نا شہید مننگ آ ڈکھیائی و است ہسونی نا درشانی ءِ کرے۔ اوپارے کہ ملک انا خذمت اٹی پولیس کارندہ غاتا بے مٹ قربانیک ءُ دہشت گردی ٹی اوار زموار آتے اوفتے اوفتا کروک نا سزا تننگک۔ ترجمان حکومت بلوچستان پارے کہ پولیو آن پاک بلوچستان ننا مشن ءِ پولیو مہم ءِ بے سہب کننگ نا کوشست کروک آک ہچ ءُ رعایت اسے نا حقدار افس۔ اوشہید کارندہ نا درجہ غاتا بڑزی و خاہوت کن صبر وجمیل نا دعاکرے۔

(اے پی پی)