جعلی لوکل یا ڈومیسائل سرٹیفکیٹ جوڑ کننگ قابل تعزیر ڈوہ اسے‘ڈاکٹرربابہ بلیدی

کوئٹہ : پارلیمانی سیکرٹری کانود و پارلیمانی امور سائنس اینڈ انفارمیشن ٹیکنالوجی ڈاکٹر ربابہ خان بلیدی پارینے کہ ڈومیسائل و لوکل سرٹیفکیٹ نا بنداو آ پاکستانی شاری سے اونا بنداوی آئینی حق آتیان محروم کننگ مفک۔ ڈومیسائل و لوکل نا بنداو آ امتیازی رویہ ءِ منپنہ‘ کرن آتیان بلوچستان اٹ رہینگوک کیہی قبیلہ غاتا لوکل و ڈومیسائل کاغد آتا بنداو آ جداگانہ شناخت ءِ بریبر کرسا آئینی حق انا احترام امی ءِ دا رد اٹ کل اسٹیک ہولڈر آتا سلابت اٹ محکمہ قانون جم سلاہ ترتیب ترسا تعلقدار فیصلہ کروک فورم آراہی کیک‘ نن دا ویل ءِ امنائی اٹ ایسر کننگ نا کوشست کینہ۔ دا خیال آتا درشانی ءِ او اسمبلی نا باسک، سول سوسائٹی، میڈیا، وکیلو اسٹیک ہولڈر آتا ارٹمیکو میٹنگ آن تران کرسا کرے‘ ہرا جمعہ نا دے محکمہ پلاننگ اینڈ ڈویلپمنٹ ڈیپارٹمنٹ نا کانفرنس ہال اٹ اڈہلک‘ دود انا بنا ٹی سیکرٹری کانود حکومت بلوچستان عبداالصبور کاکڑ ڈومیسائل و لوکل سرٹیفکیٹ نا پس منظر و دا رد اٹ چندی وخت آتے ٹی مروک صوبائی اسمبلی و بڑزکو عدالتی کارروائی آن شریدار آتے معلومدار کرے۔ ڈاکٹر ربابہ خان بلیدی پارے کہ بلوچستان ناگلزمین آ کرن آتیان آباد خاہوت آتے بیرہ مخصوص لوز سیٹلر پارسا جتا کننگ مفک۔ تدوک آ دے محکمہ کانود نا اولیکو سلابتی دیوان اٹ اصولی وڑ اٹ نن دا ہیت آ گڑتی درشان کرین کہ کیہی نسل آتیان برام‘ خوشی غم راجی زند و قبرستان شریک تینا بندغ آتیکن لوز سیٹلر کاریم اٹ اتنگپک‘ دا خاہوت آتے سیٹلر گوندسا اوفتا است آزاری ءِ کننگ کپنہ‘ اوفتے ہم ہموخس ارے اخس کہ دا جاگہ نا ہندی قبیلہ غاتے ارے۔ اوپارے کہ جعلی وڑ اٹ لوکل یا ڈومیسائل سرٹیفکیٹ جوڑ کننگ قابل تعزیر ڈوہ اسے‘ ہراٹی شفافیت کن سسٹم ءِ گچین کننگ ناگرج ءِ۔ پیشن نا بندغ آتے بلوچستان نا کانودی دستاویز جوڑ کننگ نا ہچ موکل تننگ کپنہ۔

(خ ن)