وزیراعظم و ایرانی صدر بارڈر مارکیٹ و بجلی ٹرانسمیشن لائن نا بناءِ کریر
وزیرخارجہ، بنجائی وزیر توانائی، بنجائی حوالکاری وزیر و وزیراعلیٰ بلوچستان عبدالقدوس بزنجو اسک ہم ساڑی ئسر
Get real time updates directly on you device, subscribe now.
ردیگ: وزیراعظم محمد شہباز شریف و ایرانی صدر ابراہیم رئیسی تحصیل مند انا علاقہ ردیگ اٹی مند۔پشین۔ بارڈر مارکیٹ و 100 میگاواٹ گبد۔پولان بجلی نا ٹرانسمیشن لائن نا بناءِ کریر۔ داوخت آ وزیرخارجہ بلاول بھٹو زرداری، بنجائی وزیر توانائی انجینئر خرم دستگیر، بنجائی وزیر حوالکاری و شینکاری مریم اورنگزیب و وزیراعلیٰ بلوچستان عبدالقدوس بزنجو اسک ہم ساڑی ئسر۔ وزیراعظم شہباز شریف نا گوادر آ سرمننگ آ بلوچستان نا وزیراعلیٰ عبدالقدوس بزنجو اودے بخیر کرے اوکان پد وزیراعظم مند۔ پشین۔ بارڈر مارکیٹ نا بناکن تحصیل مند انا علاقہ ردیگ آ سرمس ہراڑے ایران نا صدر ابراہیم رئیسی وزیراعظم ءِ جم وجوش اٹ بخیر کرے۔ داوخت آ ہڑتوم آ راہشونک گرم جوشی اٹ جوڑ بڑ کریر۔ وزیراعظم محمد شہباز شریف و ایرانی صدر ابراہیم رئیسی مند۔ پشین۔ بارڈر مارکیٹ نا بنائئِ کریر و ہڑتوم آ راہشونک مارکیٹ نا چندی بشخ آتا معائنہ ءِ کریر و سنگتی نا نشانی نا وڑاٹ نیال اس ہم خلکر۔ بارڈر مارکیٹ نا جوڑ کننگ آن ہڑتوم آ ملک آتا نیام اٹ واپار ءِ مون آ دننگ اٹ کمک رسینگک۔ سیم انا ہڑتوم آکنڈ رہینگوک آ مخلوق کن روزگارنا وارخواہی ودی مریک و اسمگلنگ ءِ توننگ مریک۔ داکان بیدس ہم حکومت پین 5 بارڈر مارکیٹ آتیا ہم کاریم کننگ اٹی ءِ ہرافتے زوت واپار کن ملنگک۔ اوکان پد وزیراعظم محمد شہباز شریف و ایران نا صدر ابراہیم رئیسی 100 میگاواٹ گبد۔ پولان بجلی نا ٹرانسمیشن لائن نا ہم بناءِ کریر۔ گبد۔ پولان ٹرانسمیشن لائن و زیراعظم محمد شہبازشریف نا جندی است خواہی نا سوب آن ریکارڈ مد اٹی تعمیر پورو مسنے۔ دا ٹرانسمیشن لائن نا پوروی آن ایران آن درآمد کروک آ اڑزان بجلی نا جم کچ 204 میگاواٹ مسنے۔ 132 کے وی نا ٹرانسمیشن لائن اپ گریڈ کرسا 220 کے وی کننگانے۔ 4 تُو انا ریکارڈ مد اٹی دا ڈٹ پورو کننگانے۔ پوسکن آ ٹرانسمیشن لائن آن بلوچستان نا سیمی علاقہ غاتیٹی بجلی نا فراوانی ٹی گچینی بریک و کاروباری سرجزآتیکن بجلی نا بھلو کچ اس دوئی مریک۔ دا ڈ ٹ انا پوروی آن وزیراعظم شہباز شریف نا بلوچستان اٹی بے سلنگ آن بجلی نا فراوانی ناقول پورو مسنے۔
(اے پی پی)