بارڈر مارکیٹ و بجلی ڈٹ انا بنا تاریخی ءُ ساہت اسے، قدوس بزنجو

مند : وزیراعلیٰ بلوچستان میر عبدالقدوس بزنجو پاک ایران سیم آبارڈر مارکیٹ و ایران گوادر بجلی ڈٹ انا بناءِ کننگ نا ستاءِ کرسا دادے تاریخی ساہت اس گوندانے۔وزیراعلیٰ پارے کہ پاکستان و ایران الس نا روزگار و اوفتا شونہالی کن است ایلو تون سلوک مسنو، ایران ننا برادر ہمسائے اسلامی ملک ءِ ہراڑتون ننا تاریخی‘ربیدہ ئی‘ مذہبی، واپاری و سفارتی رشتہ غاک ءُ‘ او پارے کہ ایران تون خام تیل، گیس، کنوئی آگڑا و توانائی نا بشخ آتتون اوار تین پہ تینی علاقائی واپاری ءِ شون تننگ کن بے کچ وارخواہی ارے و پاکستان و ایران نا نیام اٹ ارب آروپئی تا سال انا واپاری مریک‘ دا واپاری ءِ رسمی دروشم تننگ کن المی ءِ کہ یہ واپاری ءِ بینکنگ چینل تا کمک اٹ کننگے تاکہ دا واپاری ءِ باقاعدہ وڑ اٹ کانودی دروشم ترسا ہڑتوم آ ملک آتا زرگزرانی و اقتصادی شونداری ٹی نمان بدلی بننگ کے۔ وزیراعلیٰ پارے کہ صوبائی حکومت سیم انا روزگار تون گنڈوک مخلوق ءِ زیات آن زیات آسراتی تا فراوانی ءِ پک کننگ اٹی ءِ و پاک ایران سیم آ پین مارکیٹ جوڑ کننگ انگ ءِ۔ پاک ایران سیمی خلق مند ردیگ سیم آ پاک ایران نا سیجائی اٹ پاک ایران بارڈر مارکیٹ نا ڈٹ ءِ پورو کننگانے و اینو ڈٹ انا بناءِ کننگ کن ہڑتوم آ ملک آتا سرکڑدہ غاک داڑے ساڑی ءُ۔ او پارے کہ پاک ایران سیم اسہ تاریخی ءُ واپاری کوریڈور اسے‘ ہرا نئے بیرہ ہڑتوم آملک آک بلکہ پورو ڈیہہ اٹ بھاز اہمیت ارے و جہانی رکھ آتیان پد ہم ایرانی زرگزران مثالی وڑ اٹ شون ہلکنے ہراڑکن ایران نا الس و اونا راہشونک ستا کڑزرہ۔ وزیراعلیٰ پارے کہ پاک ایران نا اسیجائی اٹ تفوک جوائنٹ سیمی مارکیٹ نئے بیرہ مکران بلکہ بلوچستان اٹ زرگزران نا گیٹ وے مریک۔ وزیراعلیٰ دا ہیت آ زور شاغا کہ سیم آ امن ءِ برجا تخنگ و کراس بارڈر دہشتگردی نا واقعہ غاتے توننگ کن ہڑتوم آ ایلم ملک آتے اسیجائی کوشست آتے پین تیز کننگ نا گرج ءِ ہراڑکن پاک ایران مشترکہ بارڈ کمیشن اسہ اہم ءُ فورم اسے‘ ہراٹی سیم انابابت امور تے پک کننگک۔ اوپارے کہ پاک ایران واپاری نا بھلو کچ اس غیرسمی واپاری مریک ننے دا واپاری ءِ باقاعدہ وڑ اٹ اسہ رسمی ءُ دروشم اس تننگ کن گام گیج کروئی مریک۔گڑتی نا ہیت دادے کہ غیرسمی و غیرکانودی واپاری نا سوب آن سیم انا بندغ آتا روزگار ءِ کیہی ویل آک مون تروک ءُ وسیمی واپاری نا بند مننگ نا سوب آن چندی خاہوت آک زہمی مریرہ۔ نن اسہ ہندن ءُ صوبہ سے ٹی رہینگنہ ہراڑے زیات بندغ آتا روزگار سیمی واپاری تون گنڈوک ءِ و صوبائی حکومت ءِ دا واپاری تون گنڈوک بندغ آتا ویل آتاسماءِ۔ او پارے کہ سیمی واپاری ءِ گچین وڑ اٹ برجا تخنگ کن د واپاری تون گنڈوک بندغ آتا اسہ متکن ءُ خواست اس بے گرج چیک پوسٹ آتے چٹفنگ ئس۔ حکومت واپاری و پوریاگر تا ویل آتے ایسر و بارڈر ٹریڈ ءِ شون تننگ کن بے گرج چیک پوسٹ آتے چٹفسا سیمی واپاری ٹی ایلو کیہی اڑند آتے چٹفینے۔ وزیراعلیٰ پارے کہ دا جاگہ نا مخلوق محب وطن ءِ‘ دا جاگہ نا زرگزان نا کل دارومدار بارڈرٹریڈ آٹے و ہراتم سیم بند مریک تو داڑے خاہوت آتا دیگدانک پدین ننے دا کل ویل آتا سماءِ۔ وزیراعلیٰ پارے کہ زرگزرانی و اقتصادی شونداری کن المی ءِ کہ بارڈر ٹریڈ ءِ زیات گچین کننگ کن گام گیج کننگے‘ ہندن انگا گام گیج آتا گرج ءِ ہراڑان دا جاگہ نا مخلوق و جم وڑ اٹ پاکستان نا زرگزران ءِ فائدہ مرے۔ او پارے کہ حکومت بلوچستان گوادرنا شونداری کن پرعزم ءِ و گوادر نا ساڑی و آخبت نا بجلی نا گرج آتے پورو کننگ کن ایران آن پین 100میگاواٹ بجلی نا فراوانی نا ڈٹ ءِ پورو کننگانے۔ ڈٹ آ عملدرآمد کن ایران سیم آن گوادر اسکان 138کلو میٹر بھلو ٹرانسمیشمن لائن اس شاغنگانے۔ دا اہم انگا ڈٹ آن گوادر نا اُرائی و صنعتی صارف آتے بے سلنگ آن بجلی نا فراوانی ءِ پک کننگ مریک۔

(خ ن)