سپریم کورٹ، مولانا ہدایت الرحمن نا ضمانت نا درخواست منظور
دوبہ دار مولانا ہدایت الرحمن ءِ عدالت نا دنگ آن دزگیری ءِ چیلنج انتئے کننگتنے؟ جسٹس سردار طارق مسعود
Get real time updates directly on you device, subscribe now.
اسلام آباد : سپریم کورٹ گوادر اٹ برانز نا وخت آ پولیس کارندہ سے کسفنگ نا دوبہ ٹی دزگیر جماعت اسلامی نا راہشون و ”گوادر حق دو‘‘تحریک نا بن سروک مولانا ہدایت الرحمن نا ضمانت نا درخواست ءِ مسہ لکھ روپئی نا اِرا ضمانتی مچلکہ نا عوض منظور کرے۔ پنچ شنبے نادے عدالت عظمی ٹی ضمانت نا درخواست آ سماعت ءِ جسٹس سردار طارق مسعود ناکماشی ٹی مسہ باسکی بینچ کرے۔ داوخت آ جماعت اسلامی نا سروک سراج الحق ہم عدالت عظمی ٹی پیش مس۔ سماعت نا وخت آ درخواست گزار نا وکیل کامران مرتضی عدالت ءِ پارے کہ مولانا ہدایت الرحمان ءِ عدالت نادنگ آن دزگیر کننگا‘ او دسمبر 2022 آن جیل اٹی ءِ‘ جسٹس سردار طارق مسعود دا وخت آسوج کرے کہ عدالت نا دنگ آن دزگیری ءِ انتئے چیلنج کننگتو‘ وکیل کامران مرتضی پارے کہ ہمو وخت آ سپریم کورٹ نا دا فیصلہ بتویسس کہ عدالتی دنگ آن دزگیر کننگ غیرکانودی مریک‘ دا اصول ءِ سپریم کورٹ عمران خان گرفتاری کیس اٹ پک کرے۔ ایڈوکیٹ جنرل دا وخت آ عدالت نا مون آ موقف تینائی کرے کہ بنجائی دوبہ دار ماجد جوہر نا جوڈیشل مننگ اسکان ہدایت الرحمان ءِ ضمانت تننگپک۔ کامران مرتضی پارے کہ خار تننگ و کمک کننگ نا ڈوہ ٹرائل اٹ پک مریک۔ مولانا ہدایت الرحمان نا تحریک دیر انا فراوانی نابابت ئس۔ عدالت عظمی مولانا ہدایت الرحمان نا ضمانت نا درخواست ءِ مسہ لکھ روپئی نا اِرا مچلکہ نا عوض منظور کرے۔
(آن لائن)