9مئی ءِ سیاسی تاریخ اٹ تہار ءُ دے اسے نا وڑ یات کننگک، انوار کاکڑ

کوئٹہ : بلوچستان عوامی پارٹی نا بنجائی راہشون و سینیٹر انوارالحق کاکڑ پارینے کہ 9مئی ءِ سیاسی تاریخ اٹ تہار ءُ دے اسے نا وڑ یات کننگک‘ اینو ملک اٹ شرہ مننگ اٹی ءِ کہ منہ ماڑی آ جلہو کننگ داخس ءُ بھلو ہیت اس ولے بھلو ڈوہ اسے‘ ہرا ماڑی تیا جلہو کننگا او پاکستان نا ریاست نا استعارہ ئسر۔ مست آنبار زند‘ سیاست و راجی باندات آتے چلیفنگ کن راج اٹ امن وسوگوی نا بھاز گرج ءِ اینو ملک انا سیاست دان، دانشور، سول سوسائٹی ءِ سوگو راجی نظام کن اسیجا مروئی مریک‘ بے چیٹی، طوائف الملوکی نا حالیت آتا نسخان ملک و راج ہڑتوم آتے مننگ اٹی ءِ‘ پاکستان سیاسی وڑ اٹ نزوری ناکنڈآ ہننگ اٹی ءِ‘ بلوچستان ناکہول آ دا مسخت آتا مذمت ءِ کینہ و دا ہیت انا درشانی ءِ کینہ کہ بلوچستان نا شاری نا وڑ اٹ نن پاکستان ءِ علامہ اقبال نا تغ و قائد نا تعبیر نا وڑ اٹ اتنگ اٹ تینا کڑد ءِ سر ایتنہ۔ دا خیال آتادرشانی ءِ او قومی اسمبلی نا باسک روبینہ عرفان، صوبائی وزیر نوابزادہ گہرام بگٹی، بشریٰ رند، ماجبین شیران، خلیل جارج بھٹو، عارف جان محمدحسنی تون اوار پنچ شنبے نادے کوئٹہ پریس کلب اٹ پریس کانفرنس نا وخت آ کرے‘ او پارے کہ نن ملک اٹ بے چیٹی تالان کروک آتا ہر گام آ مذمت و مزاحمت ءِ کینہ‘ہرا بندغ آک 9مئی نا واقعہ غاتا زموار ءُ اوفتا برخلاف1952 انا آرمی ایکٹ انا رد اٹ کارروائی کننگے‘ دا کانود نا رد اٹ کارروائی کننگ ہچ ءُ ہیت اس دا ریاست نا کانود ءِ و ہرا باندات نا تعلقداری برائے راست فوج اتون مرے اوڑا کارروائی ہندا آرمی ایکٹ انارد اٹ کننگک۔ اوپارے کہ 2013 ٹی 2 سال اکن ہم فوجی عدالت جوڑ کننگاسس تاکہ کرمنل جسٹس سسٹم ءِ گچین کننگ مرے‘ دن اف کہ سویلین عدالت آتیا پت سلتنے ولے عدلیہ ٹی اسہ پیدوار نظر اس خننگ انگ ءِ و اسہ پڑک ہرادے عدلیہ غان رعایت رسینگ انگ ءِ تو ایلو پڑک غاو کننگ اٹی ءِ کہ اوڑتون انصاف مفننگ ءِ۔

(آن لائن)