ایران تون تعلقداری تا شونداری کن سنبرینگوک اُن، وزیراعظم

اسلام آباد: وزیراعظم محمد شہباز شریف اسلامی جمہوریہ ایران تون ودوک آ کمکاری نا اہمیت آ زور شاغسا پارینے کہ توانائی نا ڈٹ و سیمی منڈی پاک۔ایران سنگتی نا سربلندی نا نشانی ءُ، پاکستان ایران تون چندی بشخ آتیٹی تعلقداری تا مون آ دننگ و اوغانستان تون اوار ڈیہہ انا اسیجا شونہالی ءِ مون آ دننگ کن سنبرینگوک ءِ، ایران و سعودی عرب نا نیام اٹ تعلقداری ٹی پیش رفت علاقائی امن وشونہالی کن اہم ءُ کڑد اس ادا کیک۔ داہیت ءِ او ایران نا خبررساں ادارہ اسلامک ریپبلک نیوز ایجنسی (اِرنا) ءِ خصوصی انٹرویو ٹی پارے ہرا پنچ شنبے نادے آشینک مس۔ وزیراعظم پارے کہ پاکستان و ایران مذہبی، دودوربیدگی و لسانی رشتہ غاتیٹی تفوک ءُ، ہڑتوم آ ملک آتا حکومت آک تینا الس نا گچینی و راجی و اقتصادی شونداری کن خڑکی کمکاری ءِ مون آ دننگ اٹی ءُ۔ وزیراعظم پارے کہ مند۔پشین بارڈر مارکیٹ و پولان۔ گبد توانائی نا ڈٹ اسیجائی عزم انا درشانی ءُ۔ مند۔پشین تون اوار سیمی مارکیٹ آک نئے بیرہ ننا سیمی علاقہ غاتا راجی و اقتصادی حالیت آتے گچین کیرہ بلکن ہندی کاروبار کن پوسکن آ وارخواہی تے ہم مون آ دیرہ۔ دا مارکیٹ آک ہڑتوم آ ملک آتا نیام اٹ خاص وڑاٹ اقتصادی بشخ اٹی کمکاری ءِ مون آ دیرہ۔ اسہ سوج اسے نا ورندی ٹی وزیراعظم پارے کہ اونا پکا یقین ءِ کہ ہڑتوم آکنڈآتا واپار اسہ ہندن ءُ بشخ اسے ہراڑے ننے تینا کوشست آتے ترند کننگ و تینا اجتماعی توانائی و سیلہ غاتے کاریم اٹ اتوئی مریک۔ اوپارے کہ واپاری لائخی ءِ عملی دروشم اس تننگ کن داڑے بھاز بھلو گنجائشت اس ساڑی ءِ، پاکستان و ایران پنچ ارب ڈالر سالانہ واپاری کچ دوئی کننگ کن سنبرینگوک ءُ۔ دا چرجوئی ٹی بارٹریڈ میکنزم ءِ فعال کننگ اہم ءُ گام اسے۔ سیمی منڈیک ننا واپار ءِ مون آ دننگ و ننا قوم تا شونداری ٹی اہم ءُ کڑد اس ادا کیرہ۔ اوپارے کہ تدوک آ سال اگست اٹ اسلام آباد اٹی مروک آ اسیجائی اقتصادی کمیشن نا 21 می دیوان اٹی ہڑتوم آ ملک آک خاطر خواہ پیش رفت کریر، دارفتار ءِ برقرار تخنگ المی ءِ۔ وزیراعظم تینا ریمارکس اٹی پارے کہ او دا وخت آ ایران و سعودی عرب نا حکومت آتے سفارتی تعلقداری تا بحالی آ مبارکباد پیش کیوہ۔ دا مزل ایران و سعودی عرب نا سرکڑدہ غاتا پامداری و چین نا قابل قدر کڑد انا شاہدی ءِ۔ اوپارے کہ ننے یقین ءِ کہ نن پیش رفت علاقائی امن و شونہالی کن اہم ءُ کڑد اس ادا کیک۔ وزیراعظم دایقین نا درشانی ءِ کرے کہ پولان گوادر بجلی نا ڈٹ پاکستان و ایران سنگتی نا سوگوی نا درشانی ءِ ہرا ننا تین پہ تینی تعلقداری تے پین سوگو کیک۔ ہراوڑ ہڑتوم آ پلو آتا کوشست آتیان ریکارڈ مد اٹی دا ڈٹ پورو مس، دا ننا ہڑتوم آ کنڈآتا کمکاری نا عمدہ مثال اسے۔ وزیراعظم پارے کہ پاکستان و ایران نا نیام اٹ بندرگاہ و بحری کمکاری ءِ گچین کننگ کن چندی گام گیج آتیا گپ وتران برجاءِ ہرافتے ٹی گوادر و چاہ بہار نا جاڑ انگا بندرگاہ تا نیام اٹ کمکاری ہم اوار ءِ۔ وزیراعظم پارے کہ نن ہڑتوم آ ملک آتا نیام اٹ غٹ بشخ خاص وڑاٹ علاقائی واپار، ٹرانزٹ و تین پہ تینی رابطہ کاری ءِ مون آ دننگ و پین سوگو کننگ کن تینا کاریم ءِ تخنہ۔ اسہ سوج اسے نا ورندی ٹی او پارے کہ عظیم فلسفی شاعر علامہ محمد اقبال اوغانستان ءِ ایشیا نا است گونداسس، ہرا وڑ اسہ دراخ جوڑ است اس متحرک جون ءِ برقرار تخک، ہمووڑ اسہ پرامن و سوگو اوغانستان علاقائی امن و شونہالی نا کمکار مریک۔