گوادر: وزیر اعلیٰ بلوچستان و وزیر خارجہ بلاول بھٹو نا اوڑدہی

گوادر : بلوچستان عوامی پارٹی نا بنجائی صدر و وزیراعلیٰ بلوچستان میر عبدالقدوس بزنجو تون پاکستان پیپلز پارٹی نا چیئرمین وزیرخارجہ بلاول بھٹو زرداری اوڑدہی کرے‘ اوڑدہی نا وخت آ ہڑتوم آ راہشون تا نیام اٹ ملک انا سیاسی حالیت آتتون اوار تین پہ تینی استخواہی تا ایلو امورتیا گپ وتران کننگا‘ ہڑتوم آراہشونک اسہ سیاسی جماعت اسے ناکنڈآن ملک اٹ سیاسی بے چیٹی ٹی ودکی و پرغ و بٹ و بیدادی نا سیاست نا مذمت ءِ کریر وخت اس کہ اوڑدہی ناوخت آ قوم اناکنڈآن منفی سیاست ءِ مسترد کرسا پاک فوج و قومی سلامتی نا ادارہ غاتیا پتی پت انا درشانی آ است جمی نا درشانی کننگا‘اوڑدہی نا وخت آ بلوچستان نا شوندای وویل آتے ایسر کننگ آ ہیت وگپ مس۔وزیراعلیٰ پارے کہ بلوچستان بنجا نا کمک آن بیدس شون ہلنگ کپک ولے بلوچستان ءِ این ایف سی ایوارڈ نا فنڈ آتے ٹی کمتی مون تروک ءِ و پی پی ایل ہم بلوچستان نا وام تے تفننگ ءِ۔ چیئرمین پی پی پی بلاول بھٹو زرداری پارے کہ پاکستان پیپلز پارٹی احساس محرومی نا گواچی چنکا صوبہ غاتے اہمیت ایتک۔ او باور کرفے کہ او بلوچستان نا مالی ویل آتے ایسر کننگ کن وزیراعظم و تعلقدار بنجائی وزیر تتون ہیت کیک۔

(خ ن)