ہوشاپ واقعہ، بلوچستان ہائیکورٹ نا ڈی سی کیچ اتون اوار کمامدار آتے معطل کننگ نا پرمان

کوئٹہ (آن لائن) بلوچستان ہائی کورٹ نا چیف جسٹس جسٹس نعیم اخترافغان و جسٹس عبدالحمید بلوچ آ ساڑی ڈویژنل بینچ ہوشاپ واقعہ نا بابت سینئر کانود چاہندار کامران مرتضیٰ ایڈووکیٹ نا کنڈآن دائر کروک درخواست نا سماعت ءِ کرے‘ سماعت نا وخت آ درخواست گزار کامران مرتضیٰ ایڈووکیٹ، ایڈووکیٹ جنرل بلوچستان، پراسیکیوٹرجنرل، ڈی آئی جی کوئٹہ، ڈپٹی کمشنر کیچ و ہوشاپ واقعہ ٹی کزیت کروک چناتا خاہوت ہم پیش مس۔عدالت پڑک آتا دلیل تا بننگ آن پد پرمان کرے کہ ڈپٹی کمشنر کیچ، اسسٹنٹ کمشنر تربت و نائب تحصیلدار ءِ معطل کرسا انکوائری کننگے‘ عدالت پرمان کرے کہ ہڑتوم آ چنا تے سرکاری کہول آ شہید گوندنگے و ٹھپی چنانا غٹ درمان ناخڑچ آتے سرکاری کہول آ تننگے بلکہ اوفتا خاہوت ءِ پدی ہننگ کن پورو سکیورٹی تننگے۔ سماعت نا وخت آ ڈویژنل بینچ اسپیشل برانچ نا 3سینئر اسر نا جاست پاستی کمیٹی ٹہیفے ہرا واقعہ نا بابت جاست پاست کرسا رپورٹ ءِ جمع کرفک۔ عدالت پرمان کرے کہ چناتا باوہ نا ساڑی مفننگ آ اوفتا پیرہ محراب خان بلوچ نا مدعیت اٹ اولسر مقدمہ درج کننگے و مدعی نا خواست انا وڑ اٹ ایف آئی آردرج کننگے‘ عدالت عالیہ ہوشاب واقعہ ٹی لیویز نا کنڈآن دائر کروک ایف آئی آر ءِ دمدستی چٹفنگ نا پرمان کرسا واقعہ ٹی کزیت کروک چناتے جہہ وجاگہ کننگ و ایمبولینس فراوان کننگ کن ضلعی انتظامیہ ءِ پارت کرے۔